Nagaland power project atan WB-in vbc 792 pe dawn

World Bank-in hmar­chhak state paruka power project kalpuina atana cheng vaibelchhe 5,111 a thehchhuah aṭangin Nagaland chuan vaibelchhe 729.42 a chang dawn.

Power Grid Corporation of India (PGCIL) chairman-cum-managing director R.N. Nayak chuan, World Bank sumin ‘North Eastern Region Power System Improvement Project’cheng vaibelchhe 5,111 man chu Assam, Meghalaya, Mizoram, Manipur, Nagaland leh Tripura-ah kalpui a nih tur thu a sawi a, project chu PGCIL-in a buaipui tur thu a sawi bawk.

Vaibelchhe 5111 aṭangin Assam-in a chang tam ber ang a, vaibelchhe 1,473.80 a chang dawn a ni. State dang- Tripura-in Rs.vbc 1,372.20, Meghalaya Rs. vbc 776.93 , Nagaland Rs.vbc 729.42 leh Manipur-in Rs. vbc 442.22 an chang ang a, a chang tlem ber Mizoramin Rs. vbc 316.76 a chang ang.

PGCIL hotu Nayak chuan World Bank project cheng vaibelchhe 5,111 aṭangin 50% chu soft loan angin World Bank-in a pek tur thu a sawi a, a bak zawng chu sorkar laipui leh state sorkar te tum tur a ni, a ti. Sorkar laipui chuan grant angin state sorkar te hnenah a pe ang.

Nayak chuan project kalpuina atan PGCIL leh state sorkar te'n remna thuthlung an ziah tur thu a sawi bawk a, project chu peihfel a nih chuan power semdarhna ṭhat loh avanga power nasa tak kal ral ṭhin chu tihtlem a nih tur thu a sawi.

World Bank sum thawh tur, North Eastern Region Power System Improvement Project hian hmarchhak state paruka high power transmission line kilometre 3,488-a thui siam a ni ang a, hei bakah hian power transmission sub-stations thar siam a ni bawk ang.

Tripura State Electricity Corporation Ltd (TSECL) chuan kar kalta Zirtawpni khan PGCIL hi memorandum of understanding (MoU) a ziahpui nghal.