JCILPS-in MRVT Bill duh loin nawrh an huaihawt
Manipur-a pemlutte khuahkhirhna atana inner line permit (ILP) system kalpui ngiattu, Joint Committee on Inner Line Permit System (JCILPS) chuan state sorkarin pemlutte khuahkhirhna atana dan a buatsaih, Manipur Regulation of Visitors, Tenants and Migrant Workers Bill (MRVT)-2015 chu an pawm loh thu tarlangin, Pathianni zan aṭang khan dar kar 18 awh bandh an huaihawt nghal.
JCILPS chuan MRVT Bill copy an hal a, MRVT Bill pass-na atana state sorkarin assembly session a pawhsei pawh nimin khan an boycott nghal. JCILPS hian MRVT Bill hi hnuhdawh an phut a ni.
Pathianni zan lai aṭanga dar kar 18 awh bandh an huaihawtah hian zirlai naupang board exam nei mekte leh emergency service hrang hrang te chu ngaihhnathiam an ni.
MRVT Bill hi Chief Minister Ibobi Singh-a'n kar kalta Zirtawpni, March 13 khan assembly house-ah a pharh a, nimin khan pass tura ruahman a ni a, mahse JCILPS hian an dodal leh ta a ni.
JCILPS convenor Ibotombi Khuman chuan MRVT Bill chu Manipur leilung fate humhalhna tur a ni lo a, Manipur-a pemlutte khuahkhirhna tur ni loin, anmahni humhalhna tur zawk a ni, a ti.
Ibotombi chuan Bill chu state sorkarin All Political Party Committee on ILPS member te hmaa an lo hmuhtir tawh nen a danglam thu sawiin, state sorkarin house-a bill a pharh chu an enchian hnuah leilung fate humhalhna tur dân a tel loh thu a sawi.
State pawn lam mite'n Manipur an tlawhin permit pek an nih loh chuan zalen takin state chhungah an awm thei dawn tho a, sorkarin ID card a siamsak ringawt chu leilung fate humhalh nan a tawk lo a ni, tiin Ibotombi chuan a sawi bawk a, JCILPS thil phut, point nga chu sorkarin a hnawl vek a ni, a ti.
JCILPS Women Wing convenor L Nganbi chuan state leilung fate humhalh nan Manipur mipuite'n hun rei tak chhung dan siam an lo phut tawh a, mahse Chief Minister-in tun hnaia MRVT Bill a pharh chu leilung fate duh dan a ni lo, a ti a, MLA te'n mipuite duh dan an tipuitling thei lo a nih chuan an inkarah inhriat thiam lohna a thlen a hlauhthawn thu a sawi bawk.