'Make in NE' campaign tlangzarh dawn

17th March, 2015

Prime Minister Narendra Modi-a'n India ram thil siamchhuahte chawi larna atana 'Make in India' campaign a tlangzarh zulzuiin Development of North Eastern Region (DoNER) Ministry chuan 'Make in North-East' campaign tlangzarh a tum thu a tarlang.

Parliamentary Consultative Committee meeting-ah DoNER Minister Jitendra Singh chuan he thu hi sawiin, hmarchhaka thil siamchhuahte theh lar nan 'Make in North-East' chu 'Make in India' zulzuia kalpui a nih tur thu a sawi.

Consultative committee-ah hian tourism industry tihchangtlun dan tur te leh hmarchhak biala inkalpawhna infrastructure tihchangtlun dan tur te sawi ho a ni a, DoNER Minister Singh bakah Union Ministers of State for Sports and Youth Affairs Sarbananda Sonowal leh Union Minister for Home Affairs Kiren Rijiju te pawh an tel.

Singh chuan DoNER Ministry-in Delhi-ah hmarchhak mite pualin kût huaihawt a tum thu a sawi bawk a, Delhi-a hmarchhak zirlaite tana hostel siam tum mekah hostel thar pahnih siambelh an tum thu a sawi bawk a, hmarchhak zirlaite tan Jawaharlal Nehru University-ah study centre hawn tuma hma an lak thu a sawi bawk.

DoNER Minister Singh chuan hmarchhak bial brand ambassador atan boxer, Mary Kom chu ruat an tum thu a sawi bawk.

Union Minister of State for Sports Sonowal chuan hmarchhak biala inkalpawhna ṭha lo lutuk chu thil ngaihmawhawm ber a ni, tiin meeting-ah hian a sawi a, hmarchhak biala infrastructure project kalpui mekte leh la kalpui turte chu state mipuite'n an mamawh ang zela her rem a pawimawh thu leh central aṭanga thutawp siam chi a nih loh thu a sawi bawk.

Union Minister of State for Home Rijiju pawhin hmarchhak biala organic farming tihchangtlunna atana sorkar laipui hmachhawpte a tarlan bakah India ram khawpui hrang hranga hmarchhak mite himna atana Bezbaruah Committee-in report a buatsaih chu MHA-in takin a kalpui mek zel a ni, a ti.

Rijiju chuan hmarchhak bial harsatna chu power sector, tourism leh civil aviation lamah a ni, a ti a, DoNER leh a kaihhnawih ministry-te'n ṭangruala an bawhzui a ṭul a ni, a ti.