Delhi University-in NE chungchangah research programme a kalpui dawn

Delhi University chuan hmarchhak mite chanchin zir bing mi duhte tan research programme, North East India Studies Programme (NEISP) a kalpui dawn.

Research programme atan hian DU chuan senso a tum vek ang a, academic session thar aṭangin kalpui ṭan a tum a ni.

NEISP Convenor Kamei Aphun chuan, "India ram mipuite'n hmar­chhak mite chanchin an hre lo lutuk chu thil ngaihmawhawm a ni a, lehkha thiam rual te pawhin hmarchhak chanchin an hre lo lehzel chu thil ṭha a ni lo. Hmarchhak chanchin zir bingna a tam loh bawk avangin programme hi kan duang a ni," a ti.

NEISP hi DU-a Sociology Department council-in a pawmpui a la ngai a, hemi hnu hian University Academic Council-in a pawmpui a la ngai dawn a ni.

Aphun chuan NEISP kalpui dan tura, vision document an buatsaih chu University Grant Commission hnenah theh­luh an tum thu a tarlang bawk a, member panga awmna committee-in vision document chu an buaipui tih a sawi bawk.

Delhi University chuan Department of Sociology-in MA leh MPhil programme a kalpui mekah hmarchhak chanchin chu syllabus-ah telh a tum bawk.