Kum 2020-ah NE state zawng zawngah rel luhtir vek tum Silchar-ah March 13 khan rel lian lu a lut

Union Minister of State for Railways Manoj Sinha chuan tun hnai khan Rajya Sabha inkhawmah hmarchhak state khawpuite chu rel hmanga thlunzawm vek an tum thu a sawi a, mahse a hun bithliah a tarlang lo. Indian Railways chuan Thawhṭanni khan kum 2020-ah hmarchhak state-ahte rel luhtir vek a tum thu a puang.

Northeast Frontier Railway (NFR) General Manager (Construction) Rajesh Kumar Singh chuan he thu hi sawiin, Sikkim tiamin hmar­chhak state khawpui zawng zawngte chu kum 2020-ah Indian Railways map-a chuantir vek an tum thu a sawi a, Railway department-in ‘Mission 2020’ chu a kalpui ṭan tawh thu a sawi bawk.

NFR GM Singh chuan rel luhtirna atana an hun bithliah tarlangin, kum 2016, March-ah Agartala-ah rel lian luh tir an tum thu a sawi a, kum 2017, March 31-ah Manipur, Tupul-ah rel luhtir hman an tum thu leh Mizoram, Sairang thlengin kum 2018, March thlaah rel lian luhtir an tum thu a sawi bawk.

Manipur khawpui Imphal leh Tupul inkara rel kawng chu siam mek chu March, 2019-ah peihfel an beisei thu a sawi bawk.

March 31, 2020-ah Meghalaya khawpui, Shillong leh Sikkim-a Rangpo thlengin rel a luh tir an tum thu Singh chuan a sawi bawk a, Nagaland-a rel luh dan tur chungchang chu a sawi lang lo.

Railway department chuan ‘Mission 2020’ tihpuitlin nan ngawrh taka hna an thawh mek thu a sawi a, March 31-a rel lian luhtir tura Silchar rel kawng project kalpui mekah March 13 khan a enchhian nan rel lian lu luhtir a nih tawh thu a sawi bawk.