Zu rui chunga lirthei khalh thubuai 270 ziaklut

Guwahati Police-te chuan March 15, Pathian­ni tlai aṭang khan zan lama zu rui chunga lirthei khalh ṭhin te dapchhuah beihpui an thlak a, thubuai 270 an ziaklut tawh.

Guwahati City Police Commissioner Mukesh Agarwala chuan khawpui chhunga zan lama zu rui chunga lirthei khalh an tam thu a sawi a, hei hi lirthei chetsualna tam tak thlentu a ni, a ti.

Police te'n lirthei khalh­tute an enfiah tih mipuiin an hriat hnuah thu a darh chak hle a, hei vang hian zu rui chung­a lirthei khalh tam tak chuan police te en­fiahna hmun an pumpelh phah a ni, a ti a, mahse rui chunga lirthei khalh ṭhinte dapchhuah hna chu khauh taka kalpui zel a nih tur thu a sawi.

Rui chunga lirthei khalhte dapchhuaktu atan Agarwala chuan motorcycle pali zel awmna police team pariat an siam thu a sawi a, chhun leh zanah patrolling neih ṭhin an tum thu leh zan lama vantlang bungrua tihchhiat chingte pawh dapchhuah an tum thu a sawi bawk.