Lungalhthei laihchhuah khap vangin M'laya-in revenue a hloh: CM Sangma

Chief Minister Mukul Sangma chuan National Green Tribunal (NGT)-in Meghalaya-a lungalhthei laihchhuah a khap avang­in state sorkar chuan financial year kalta khan cheng vaibelchhe 600 a hloh thu a sawi.

NGT chuan Megahalya-a lungalhthei laihchhuah dan chu environment leh hnathawktute tan a him lo tiin nikum April 17 khan a khap a ni.

Assembly session-a UDP MLA Paul Lyng­doh-a zawhna chhangin Chief Minister Mukul chuan he thu hi a sawi a, lungalhthei laih­chhuah dan rintlak leh him zawk kalpui a nih theih nan state sorkarin a zir­chian hna a kalpui thu leh revenue lakluh nan Task Force Committee a din thu a sawi bawk.

Revenue chheprelh a awm tia eptute puhna chu Mukul chuan a pha a, revenue la ṭhin sorkar department hrang hrangte revenue lak tihpunna atana rawtna siam turin Task Force Committee chu din a nih thu a sawi bawk.

Sumdawnna aṭanga sumdawnna aṭanga chhiah lak danah state sorkar chuan 'Mission Mode Project for Computerization of Commercial Taxes with e-services' kalpui a tum thu a sawi bawk a, state sorkarin e-payment kalphung a siam thar avangin Computerize Society hnen aṭangin chawimawina an dawn thu a sawi bawk.

Hetihlai hian Garo National Liberation Army (GNLA) helin remna zawnga inbiakna a awm theihna atana an chairman tuna jail tang mek, Champion R. Sangma chhuah zalen tura state sorkar an phut chu Chief Minister Mukul chu tihpuitlin an tum loh thu a sawi a, hel pawlte inbiakna neihpui an tum rih loh thu a sawi.

"GNLA te chu firfiak pawl an ni a, firfiak pawlte thil phut chu ngaihtuah kan tum rih lo. GNLA te'n tharum thawhna leh pawikhawihna an bansan hnuah chauh remna zawnga inbiakna neih chungchang chu kan ngaihtuah ang," tiin a sawi.

State sorkarin inbiakna neihpui atana GNLA helte a sawmna chu hel pawlte hian pawmin, mahse an chairman Champion chu chhuah zalen phawt an phutlet thung.

Mawhati MLA, Hynniewtrep National Liberation Council (HNLC) chair­man hlui, Julius

Dor­phang-a'n HNLC te nena remna zawnga inbiak­naah palaia ṭan a hreh loh thu a sawi chung­­changah Chief Minis­ter Mukul chuan HNLC te nena remna zawnga inbiakna neih tur chu state sorkar leh sor­kar laipuiin ṭangruala a ngaihtuah tur a nih thu a sawi.

"HNLC te nena remna zawnga inbiakna nei turin sorkar laipui pawh kan ngen tawh a, a chhanna kan nghak mek a ni," a ti.

HNLC te nen inbiakna nei turin sorkar laipui chuan hel pawlte chu tharum thawhna bansan hmasa turin a phut a, hei vang hian hel pawlte chuan boruak muanawm an thlentir hmasa phawt tur a ni, tiin Chief Minister Mukul chuan a sawi bawk a, Home department chuan inbiakna atan hma a la mek a ni, a ti.