Tripura : Tuilianin kam lam a pan

Tripura-a ruah sur nasa avanga tuilian chuan kam lam a pan ṭan. Kar liam ta Thawhṭanni aṭang khan ruahsur nasa vangin tuilian hi an tuar a, chhiatna tam tak thlengin mi 24 in nunna an chan tawh a, mi nuai 1.28 chuan an in leh lo chhuahsanin chhawmdawlna-in an pan tawh bawk.

Tuilian hian kam lam a pan tih Tripura chief minister Manik Saha chuan a tarlang a, Gomati lui chu a chim chin a hniam zel tih a sawi bawk. Saha hian tuilian an tuar laia chhanchhuah leh chhawmdawl hna thawktu - district admistration, NDRF leh SDRF chungah lawmthu sawiin an zarah tuilian vanga harsatna tawk an tlem phah niin a sawi.

CM Manik Saha chuan tuilianin a tihchhiat hlut zawng chu Rs vbc 15,000 hu a ni tih a sawi. Inrinni khan political party dangte chu tuilian hnua an indinthar lehna kawnga thawk ho turin a sawm bawk. Party dangte chuan ruahmanna an neihte an thlen a, an harsatna tawh sukiang turin an thawk ho dawn tih a sawi a ni.

Saha chuan Tripura chhunga lui liante chim chin chuan hlauhawm chin a pel tawh lo tih sawiin, Gomati lui chim chin pawhin hniam lam a pan zel a ni, a ti. Mitthi chhungte zangnadawmna Rs nuai 4 pek an nih tur thu leh hliam tuarte Rs nuai 2.5 pek an ni dawn tih a sawi bawk.

Tripura-a neih tura ruahman, Northeast Council (NEC) meeting chu state chhunga tuilian thleng vangin sawn hlat a ni. NEC meeting hi August 31 - September 1 a neih tura ruahman a ni. Northeast Council chuan meeting sawn a nih thu hi X lamah tarlangin "Agartala-a neih tura ruahman, Plenary Meeting chu sawn a ni" tiin, NEC meeting neih a nih hun tur chu a hrana puan leh a nih tur thu an tarlang.

NEC meeting hi Union home minister Amit Shah leh DoNER minister Jyotiraditya Scindia te kaihhruaina hnuaia neih tur a niin, hmarchhak state-a chief minister leh Governor zawng zawng an tel bawk ang.