Kum tling lo pawngsualtute hrem lohin kan chhuah lo ang : Assam CM

Assam chief minister Himanta Biswa Sarma chuan hmeichhia kum 14 mi - Dhing, Nagaon district-a cheng pawngsualtute chu hrem lohin an chhuah dawn lo tih a sawi.

Pawngsual tuartu kum 14 mi hi Ningani zan khan tuition a kal a, thirsakawra a haw lam chu mi pathumin kut lo thlakin an pawngsual zui ta a ni. Pawngsual tuartu hi khaw mite chuan dil bulah hmuin damdawi-in panpui nghal niin a hliamte enkawl a ni.

Himanta chuan Dhing hmuna thil thleng chu mihring chunga pawikhawihna rapthlak tak a nih thu sawiin mipuite rilru a khawih tlang hle tih a sawi a, "Pawikhawihtu tumah kan zuah lo ang, rorelna hmaah kan hruai ngei ang" a ti. Assam Director General of Police chu pawikhawihna hmuna kala thilsual titu chhui chhuak vat turin a hriattir bawk.

Dhing khuaa pawikhawihtu zinga pakhat, Tafazul Islam chu August 23, Zirtawpni khan man niin Inrinniah chhuichianna an kalpuina kawng pakhat atana pawikhawihna hmuna an hruai laiin tlan chhuah a tum a, dilah zuang thlain darkar hnih a liam hnuah a ruang hmuh a ni. Pawikhawihtu pahnih erawh zawn mek an la ni.

Assam chief minister chuan sorkarin hmeichhiate laka pawikhawihna thlen chu a ngai thutak hle tih a sawi a, thil tisualtute chu hrem loha chhuah a tum lo tih a sawi. Assam police-te chu hetiang thubuai rang takin an ching fel ṭhin tiin a fak bawk. Assam Congress president Bhupen Borah chuan Dhing khuaa pawngsualna thleng chungchang hi sawilangin thilsual titute chu an sakhua emaw a hnam ang zawnga thlir loa, an thil tih ang zawnga hremna pe turin a duh tih a sawi. Borah chuan BJP sorkar chu sakhaw hrang hrang zuitute inkara inhuatna tuh tumah a puh bawk.