Nagaland : Dimapur-ah tihluihnaa pawisa khawn duh loin kawng an zawh

Nagaland-a Diphupar Village Council bultumin kar liam ta Inrinni khan Dimapur-ah tihluihnaa pawisa khawn leh an hruaitute leh mipuite vau an ni ṭhin duh loh lantir nan kawngzawh a ni. Dimapur airport aṭangin kawngzawh hi ṭan niin Chumoukedima-a Agri Expo gate thleng an kal.

Kawngzawhte chuan Diphupar hmuna misualte chetna thleng ṭhin chu an dem tih tarlangin mipuite leh sumdawngte tan hlauhna an thlen fo tih an tarlang. Agri Expo gate bulah kawngzawh kharna hun neih niin resolution paruk an pawm a, Chumoukedima DC hnenah an thehlut a ni.

An resolution-ah hian Diphupar khaw huamchhung vantlang hmuna ralthuam chelek an duh loh thu tarlangin, ralthuam chelek lo tura inremna an neih chu a taka zawm ni se an duh tih an tarlang. Diphupar khaw huamchhungah "one government, one tax policy” kalpui an duh tih an sawi bawk.

Hemi bakah hian helpawl zinga mi Kahovi Chishi, Diphupar Naga Youth Organisation president leh mipuite vau ṭhintu chu National Security Act hnuaia thubuai siamsak tura an duh thu leh, an khua aṭanga hnawhchhuah an nih thu an tarlang bawk.