N'land CM Zeliang-a'n Vote on Account a pharh

Nagaland Chief Minister TR Zeliang chuan financial year thar, April 1, 2015 aṭanga July 31, 2015 thleng state sorkar senso tur, vote on account-ah cheng vaibel­chhe 3868.16 a pharh a, senso tur hi state consolidated fund aṭanga pawhpen turin a ruahman.

12th Nagaland Legislative Assembly session vawi riatna neih mekah Thawhlehni khan Finance portfolio changtu, Chief Minister Zeliang chuan vote on account hi a pharh a, budget puiltling a pharh theih loh chhan sawiin, sorkar laipui aṭanga plan fund an dawn tur a la fel loh vang leh Planning Commission thlaktu, National Institute for Transforming India (NITI) Aayog kalphung tihfel loh vang a ni, a ti.

"13th Finance Commission hun tawp aṭang­in 14th Finance Commission hun tharah kan chuang kai ṭan chauh a ni a, 14th FC-in state tinte tana ruahmanna thar a siamsakte chu kan la zirchian a la ngai a ni," a ti.

Zeliang chuan an ruahman ang chuan financial year 2015-16 chhunga state sorkarin revenue aṭanga sum lakluh a beisei zat chu cheng vaibelchhe 11754.29 a ni, tih a tarlang a, hei hian state consilidated fund-ah positive balance cheng 175.38 a siam tur thu leh mahse Public Account-a sum indaihlohna cheng vaibelchhe 175.38-in a khûm nghal thu a sawi.

FY 2015-16 chu budget deficit cheng vaibelchhe 1252.85-a khar a nih tur thu a sawi bawk.

Nagaland Chief Minister chuan sector hrang hrang aṭanga chhiah lakah sum chheprelh a awm loh nan chhiah lak dan chu khauh leh chak zawka kalpui an tum thu a sawi bawk a, tun hnaiah budget deficit ṭhahnem tak nei mah se Centrally Sponsored Scheme (CSS), North Eastern Council (NEC) leh Non lapsable central pool of resources (NLCPR) hnuaia welfare scheme hrang hrangte chu ṭha taka kalpui a ni, tih a sawi.

Zeliang chuan NITI Aayog chu hun inthlak danglam zelah ṭangkai zawka an chhawr theih a beisei thu a sawi bawk a, sorkarin thil ṭul loa sum a khawhral ṭhin chu tihtawp a ṭul thu leh inrenchem a ṭul thu a tarlang.

Zeliang chuan July thla ral hnuah a kaihhruai sorkar chuan Budget puitling a pharh theih ngei a beisei thu a sawi bawk a, Governor thuchah sawi tur pawh session neih leh hun atana dah a nih thu a sawi bawk.