KNP-a samak te humhalh nan sorkarin ruahmanna thar a siam

Union Environment and Forest Minister Prakash Javadekar chuan sa pel ru ṭhinte'n Kaziranga National Park (KNP)-a samak an kap ṭhin chu harsatna lian tak a nih thu sawiin, sorkar laipuiin theihtawp chhuah­in hma a la mek tih a sawi a, Wildlife Protection Act siamṭhat nan Parliament-ah Bill putluh a nih thu a sawi bawk.

Union Minister Javadekar chuan he thu Lok Sabha ṭhutkhawmah Thawhlehni khan sawiin, sa pel ruk ṭhin chu harsatna lian tak a tlin tawh thu a sawi.

Hetihlai hian Java­dekar chuan, "Mihringte leh ramsate inkarah ram inchuhna nasa tak a awm a, khawvel puma mihring chen theihna ram 17% aṭangin India chuan 2.5% chauh ram kan nei a, ramsa leh ran rualte pawh kan nei bawk si a, mahse hemi avang hian ramsa kah phal tihna a ni lo," a ti.

"Ramsa kahhlum chu tihtawp a ngai a, hemi atan hian Wildlife Crime Bureau leh sorkar laipui chuan theihtawp chhuahin an bei mek a ni. KNP hi ka tlawh a, Assam sorkar nen ṭang­rualin Rhino Protection Force kan din tawh bawk. Rhino Task Force chuan report an thehlut tawh bawk a ni," a ti.

Union Environment and Forest Minister chuan nikum khan ramsa pel ru ṭhin mi 22 thah an nih thu a sawi bawk a, ramsa humhalh nan theihtawp chhuahin kan bei a ni tiin a sawi.

Ramsa leh mihringte inkara ram inchuhna chungchang chu sawi zawmin Javadekar chuan, "Innngeih taka cheng ho tur kan ni a, ramsa avangin mihring nunna hloh theih a ni lo a, chutiang bawkin mihring avangin ramsa nunna kan hloh thei lo. Mihringte chenna tur leh ramsa te chenna tur chung­changah hmalak mek a ni a, zângnadawmna te pawh ruahman a ni bawk. Kan hmalakna hmasa ber chu ramsa te leh mihring inchen pawlh loa awmtir a ni," a ti.