Arunachal Guv-in Spring Carnival a hawng

Arunachal Pradesh Governor Lt Gen Nirbhay Sharma (Retd) chuan Thawhlehni khan ‘Arunachal Spring Carnival’ a hawng.

Ni thum awh tur carnival hi East Siang district headquarters, Pasighat bul, Sile Leging-ah hman a ni a, vawiin hian khar a ni ang.

Governor Sharma chuan state tourism thehlar nan Arunachal leilung fate hnam nun zia leh hnam thilte chu nasa zawka phochhuah a ngai a ni, a ti.

Governor chuan hmasawnna atana infrastructure din kawngah tribal te hnam thil humhalh a pawimawh tel thu sawiin, eco-friendly taka kalpui ṭha a tih thu a sawi a, tribal te hnam nunphung mawina leh Arunachal leilung mawinate chu tourist te'n an hriatpui tur a ni, a ti.

Arunachal chu World Tourism Map-a chuantir turin theihtawp chhuaha tourism thehlar a duh thu a sawi bawk a, Spring Carnival ang te buatsaih a nih zel chuan hma lam hun lo la awm turah nasa zawka khualzin an hip luh ngei a beisei thu a sawi bawk.

Arunachal Governor chuan tribal hnam nun ze mawi chhawm tlakte chu vawn nun zel a pawimawh thu a sawi bawk a, mi tam tak tana eizawnna tling tur, tourism thehlar nan ṭhalaite chu theihtawp chhuah turin a ngen bawk.