Assam sorkarin dan a kengkawh ṭha tawk lo : Congress MP

Congress member of parliament, Gaurav Gogoi chuan dan leh hrai kenkawh kawngah Assam sorkar chu a hlawhchham niin a sawi. He thu hi tun hnaia Dhing khuaa kum tling lo pawngsual chungchang a sawinaah sawi chhuakin, Gogoi chuan state chhungah hmeichhiate an him lo hle a, pawngsual leh kut tuar an awm reng a ni, a ti.

Lok Sabha-a Congress deputy leader Gogoi chuan Dhing, Nagaon district a pawngsual tawktu hmeichhe naupang a tuarpui takzet tih sawiin, pawikhawihna tuartu leh a chhungte lam a ṭang tlat tih a sawi. He pawikhawihna hian mipuite a ti thinur takzet a, thil tisualtute chunga hremna na tak pek an duhna chu a thlawp tih a sawi bawk.

Jorhat constituency, Assam MP Gogoi hian an state chhungah hmeichhiate himna a derthawn zel thu sawiin, sorkar chuan anni venghim tur hian hna a thawk ṭha tawk lo tih a sawi. Hmeichhe kutthlak leh pawngsual a thleng nawn fo hian dan leh hrai kenkawh kawnga sorkar hlawhchham zia a tilang a ni, a ti.

Pawngsual thubuai ziahluh a tlahniam : Assam CM

Gaurav Gogoi-a'n dan kengkawh ṭha tawk lo leh hmeichhiate venghim zo loa a puh laiin Assam chief minister Himanta Biswa Sarma chuan hemi kawnga hma an sawnna a sawi ve thung. Sarma chuan kum 2019 hnu lamah pawngsual case 83% laiin a tlahniam tih a sawi.

Chief Minister chuan BJP sorkar hmasa, kum 2016-2021 inkar khan kum tin pawngsual thubuai 3,000 chuang an ziak lut a, kum 2019-ah thubuai ziahluh tam berin case 3,546 an ziaklut tih a sawi. Hemi hnu hian tlakhniam lam panin kumin July thla thleng khan thubuai 580 chauh ziah luh a ni tawh a ni, a ti.

CM Sarma chuan Congress kaihhruai, kum 2001-2016 inkara sorkar hnuaiah pawngsual thubuai a tam ber niin a sawi. Pawngsual chu mihring chunga pawikhawihna rapthlak tak a nih vangin pawngsual thleng reng reng ngaihzam theih a ni lo a, khawtlang mipui nen ṭangrualin he pawikhawihna rapthlak tak tireh tura hma lak a ngai tih CM chuan a sawi.