Tripura : Tuilianin sikul 200 chuang tichhia

Tripura-a tuilian vanga chhiatna hrang hrang thlengin a nghawng nat zinga mi chu zirna-in leh zirlaite niin, sikul 200 chuang a chhiat bakah zirlai 12,000 chuan an lehkhabu an hloh a ni.

Tripura secondary education director, NC Sharma chuan tuilian vanga zirlaite tuarna hrang hrang tarlangin zirlai tam tak chhawmdawlna-in lama an awm thu a sawi a, zirchianna hmasa an kalpuinaah sikul hmunhma leh bungrua Rs vbc 11 hu tuilian hian a tichhia a ni, a ti. South district-ah leiminin sikul pahnih luah leh tlak lohin a hnawl chhia tih a sawi bawk.

Sharma hian sikul 239 chu chhawmdawlna-in atana hman lailawk a ni tih thu a sawi a, heng hmuna hri a darh loh nan school inspector leh District Education Officer te chu tifai turin sorkar chuan a hriattir tih a sawi. Zirlai naupang 12,000 lehkhabu hlohte chu State Council of Educational Research and Training (SCERT) in an lehkhabu tur a ngaihtuahsak dawn tih a tarlang.

Tuilian vang hian kar liam ta Nilaini, August 21 aṭang khan thu leh awm hma atan sikul chawlh puan a ni a, sikul chawlh hi hriattirna thar awm leh hma chu kalpui chhunzawm a ni dawn tih Sharma chuan a sawi. Semester exam zawng zawng pawh sawn hlat a ni, a ti.