Nagaland : LSU-in pastor kutthlaktute an dem

Nagaland-a Naukhuti khuaa Yanpha Baptist Church pastor, Rhanlamo Kikon chu kar liam ta Inrinni khan helpawl, National Socialist Council of Nagalim (Khango) mi leh sate chuan chhan mumal awm loin an sawisa a, he thil thleng hi an dem takzet tih Lotha Students Union (LSU) chuan an tarlang.

Pastor Kikon beihna hi ruahman lawk sa ni ngeia an hriat thu sawiin pistol pawh kahpuah a ni, LSU chuan an ti. LSU chuan, "Pawikhawihtute hian a tuartu dikna leh zahawmna an palzut bakah sakhaw hruaitu zah lohna lian tak a ni" an ti.

LSU chuan pastor kutthlaktute chunga hremna pek ngei an phut tih sawiin, a thlen nawn tawh loh nan hma la turin thuneitute chu an ngen bawk. NSCN chuan mi an sawisak ṭhin chu an tihtawp a ngai tih LSU chuan sawiin, hetiang pawikhawihna thleng ṭhin hian an pawl a tihmingchhia a ni, an ti.

NSCN chuan tharum hmanga mi a beih ṭhin a titawp lo a nih chuan Naga hnam inpumkhatna kawngah thil ṭha lo zawk a thleng thei tih tarlangin, titawp tura hma an la thuai lo a nih chuan thlawp an tum tawh lo tih LSU chuan an tarlang. LSU hian kut tuartu Kikon leh a chhungte lam an ṭang tlat dawn tih an sawi bawk a ni.