Nagaland : Sorkarin darkar 72 chhunga kawngpui thianfai turin NHIDCL hriattir

Nagaland sorkar chuan an state khawpui, Kohima leh district pawimawh dangte kalpawhna kawngpuia lei thenfai loha awmte chu tifai turin National Highways and Infrastructure Development Corporation Limited (NHIDCL) leh an hnuaia contractor-te a hriattir.

Nagaland chief secretary hoin August 26, Thawhṭanni khan sorkar hotu pawimawhte an ṭhukhawm a, NHIDCL-in kawngpuia lei tlate thianfai tura hma an la chak tawk lo chu pawi an tiin darkar 72 chhunga thianfai turin thu an pe a ni. Kohima leh district hrang hrang inkalpawhna a ṭhat loh avang hian mipuiten harsatna an tawk a ni.

NHIDCL hian state sorkar leh khawtlang thlawpna dawng ṭha hle mah se an hna an thawh ṭhat loh vangin sawisel an lo tawk fo tawh a, tun hi a ṭum khatna a ni lo. State sorkar leh tualchhung miten an theih ang tawka an pui chunga NHIDCL in hma a la chak tawk lo chu a lawmawm lo hle tih sawiin, Nagaland sorkar chuan darkar 72 chhunga highway-a lirthei pangngai taka a kal leh theih nan hma la turin a hriattir a ni.

Nagaland sorkar chuan company hian an thupek an zawm lo a nih chuan kawngpui thenfai hi anmahniin an tih mai a ngai dawn tih sawiin, thawktu leh khawl hman ngaite an tir chhuak anga, a senso erawh NHIDCL chuan an chawi thung ang.