Tripura : State pahnih CM-in ṭanpuina an pe

Tuilian vanga harsatna tawk mek, Tripura ṭanpui nan Madhya Pradesh leh Uttar Paradesh chief minister chuan sum an pe tih Tripura chief minister Manik Saha chuan a sawi. Anni bakah TIPRA Motha hotupa, Pradyot Kishore Manikya Debbarma pawhin ṭanpuina sum a pe bawk.

Manik Saha chuan tuilian tuarte ṭanpui nan Yogi Adityanath (Uttar Pradesh CM) chuan Rs vbc 10 a pe tih sawiin, Dr. Mohan Yadav (Madhya Pradesh CM) chuan Rs vbc 20 a pe bawk tih X lamah a tarlang.

TIPRA Motha chief, Debbarma pawhin Rs nuai 10 pein an state chhunga tuilian chu rampum huapin ngaihven a hlawh tawk lo tih a sawi. Tripura chuan chhiatna rapthlak tak tuarin mi tam takin chenna in an chan bakah an bungruate tihchhiat a ni tih sawiin, nunna chan eng emaw zat awm mah se media-te chuan Kerala leh Himachal Pradesh a khuarel chhiatna thleng angin an ngaihven tawk lo tih a sawi.

Debbarma chuan state pawn lama cheng, ṭanpui an mamawh nia hriate chu an theih dan kawnga ṭanpui turin a ngen a ni. "Tuilian rapthlak takin a nghawngte hi ṭanpui hram rawh u" tiin Debbarma chuan a ngen. Tun hun hi politics-a inbeihna hun a ni loa, hnam ang zawng emaw sakhuana hawi zawnga chet lakna hun a ni lo tih sawiin khuarel chhiatna an hmachhawn mek a kian theih nana ṭangrual turin mipuite a chah bawk.