Manipur CM-in BJP thupuangtu chhungte beihna a dem

Manipur chief minister N Biren Singh chuan an party, Bharatiya Janata Party thupuangtu Michael Lamjathang Haokip chhungte chenna, Churachandpur district-a mi beih a ni chu a dem tih a sawi. BJP thupuangtu chenna hmun hi Pathianni zan, August 25 khan suasam niin hal tum a ni tih tarlan a ni bawk.

Manipur CM chuan, "Michael Lamjathang chhungte chenna beitute hian an dawihzep zia an lantir a ni" a ti.

Biren Singh chuan Lamjathang chu Thadou hnam hruaitu zinga mi a nih thu leh, he hnam hi Manipur-a cheng hnam zinga a upa ber pawl a ni tih a sawi bawk. Lamjathang chenna beih a ni chu an state chhunga recognised tribe beihna anga a ngaih thu te, Manipur inpumkhatna tihchhiat tumna a ni tih thute a sawi. CM hian pawikhawihtute hi dan ang taka chhui an ni dawn tih a sawi bawk.

BJP thupuangtu, Lamjathang chenna hmun misualten an beih hi Phailien khuaa awm niin Pathianni zan dar 11 vela beih nia tarlan a ni. Hei hi tun hnaia beih a tawh ṭum hnihna a ni.Thadou Community International (TCI) pawhin Lamjathang chenna in beih a ni hi an dem thu an sawi ve bawk. TCI chuan Lamjathang chenna in beitu hi mi 30 vel bawr an ni tih sawiin, silai ṭum eng emaw zat an hmehpuah bakah in bula bungruate chu hal an tum tih an tarlang.

TCI chuan Lamjathang hi 'Kuki Supremacy and its Agenda' tih thupui hmanga thu an sawinaa a tel hnu lawka inbeihna hi thleng a ni tih sawiin Thadou hnam pumpui beihna angah an ngai a ni. Lamjathang chunga pawikhawihtute hi dan anga hrem ngei turin sorkar chu an phut tih an tarlang bawk.