Arunachal : Sorkarin biodiversity map a tlangzarh

Arunachal Pradesh-a department of Environment, Forest and Climate Change chuan state chhunga nungcha leh ramngaw inzarpharh dan tarlanna - biodiversity map a tlangzarh. Biodiversity map hi artist Sudarshan Shaw buatsaih niin ramngaw leh nungcha bakah an hnam tana thil pawimawhte tarlang a ni bawk.

Arunachal chief minister Pema Khandu chuan map thar an nei thei chu lawmawm a tih thu sawiin, an state chu nungcha leh ramngaw lama a hausakzia tarlanna ṭha tak a ni tih a sawi. Biodiversity map chuan environment humhalh kawnga a puih theih a beisei thu leh, sustainable development kalpui nan a ṭangkai ngei a beisei tih a sawi a ni.

Biodiversity map-ah hian state chhunga ram inzarpharh dan bakah tlangdung awm dante tarlan niin ramsa - Bengal Tiger, snow leopard leh Arunachal chhungah chauh awm sava chi hrang hrang leh thingkungte tarlan a ni. Ramngaw humhalh lai leh biodiversity zones chu chiang taka ziahlan niin, Arunachal-in ramngaw leh nungcha humhalh a ngaih pawimawh zia a tarlang.

He map-ah hian Arunachal-a cheng, tualṭo hnam 26 tarlan a ni bawk. Map duangtu Shaw chuan nungcha ngainatute leh state chhunga cheng nungchate tarlanna duan chu mawhphurhna lian tak a ni tih a sawi. Arunachal-ah hian forest cover hi 85% niin khawvel leh India rama state dangte ramngaw humhalh kawnga kaiharhtu a nih a beisei tih a sawi bawk.