Assam : Eptu pawlin President hnenah CM ban turin an ngen

Assam-a eptu party 18 thawk ho, United Opposition Forum Assam (UOFA) chuan an state chief minister Himanta Biswa Sarma chu sakhaw hrang hrang inkara inhuatna tuh tuma thu a sawi leh, India danpui kalh zawnga thu a sawi vangin a nihna aṭanga ban turin India president Droupadi Murmu leh Assam Governor Lakshman Prasad Acharya hnenah an ngen.

UOFA hian tun hnaia CM thusawiah ui a nena a intehkhin chu chief minister zahawmna tibawrhbang thei a ni tiin, hemi hma pawh hian sakhaw hrang hrang inngeih lohna thlen thei leh India danpui kalh zawnga thusawi a ngah hle tih an tarlang. Assam Congress president Bhupen Kumar Borah chuan President leh Governor hnenah Sarma chu CM a nihna aṭanga ban turin a ngen a ni.

Eptu ṭangrual pawl hian Chief Minister lakah hian Dispur Police Station-a thubuai thehluh an tum thu an sawi bawk. Hemi bakah hian UOFA hian Supreme Court-ah Sarma leh a chhungte hausakna chhui chiang tura ngenna an thehlut dawn tih an tarlang bawk.

Assam Jatiya Parishad (AJP) president leh UOFA secretary ni bawk, Lurinjyoti Gogoi chuan Himanta kaihhruaina hnuaia an awm chhung chuan an state chu a him lo tih sawiin, sakhaw hrang hrang vuantute inkara inhriatthiam lohna awmte ching fel tura hma la duh loah sorkar chu a puh. "CM thil tihte hian kan ṭhalaite hmalam hun a tichiang lo a ni. Kum 2026 assembly inthlan hmaa a thil tih tum awmchhun chu Hindu leh Muslim inkara buaina chawh chhuah a ni," a ti. Sarma hnuaiah dan leh thupek kenkawh kawngah an state chu an hlawhchham a, CM ngei pawhin thla hnih chhungin pawngsualna ṭum 23 a thleng tih pawh a lo sawi tawh a ni, tiin a tarlang.

Independent Rajya Sabha MP Ajit Kumar Bhuyan pawhin Sarma leh a chhungte bungraw neihte chu mipui hriata puanzar thuai a ni dawn tih a sawi ve bawk. UOFA hian 'Charge Sheet' tia an vuah- sorkar lai thil tih dik loh 60 inziahna chu an lo tlangzarh tawh a, chhuah hnihna turah hian Sarma leh a chhungte hausak dan tarlan an tum a ni.

Bhuyan chuan Assam sorkar chu hmeichhiate venhim kawngah a hlawhchham nia sawiin, CM chuan an state mipuite leh an thil neihte a venhimsak zo lo niin a sawi. Gogoi pawhin sorkar chu dan leh hrai kenkawh kawngah a hlawhchham hle niin a sawi ve bawk. UOFA hruaitute hian Assam mipuite chu remna an neih vawnghim hram turin an chah.