Zu khapna dan tihdanglam turah Kohhran leh mipui rawn an ni dawn : Nagaland CM
Nagaland legislative assembly chuan monsoon session an nei mek a, hetah hian kum 30 chuang an lo hman tawh zu khapna dan Nagaland Liquor Total Prohibition (NLTP) Act chungchang sawi lan a ni.
Nagaland chief minister Neiphui Rio chuan an state-a zu khapna dan an hman mek siam danglam dan tur chungchang sawi ho turin sorkar chu a inpeih tih a sawi. Hetih rual hian NLTP Act an tih danglam hmain civil society groups, mipui leh Kohhran rawn hmasak an ni dawn tih a sawi.
Nagaland hian zu leh a kaihhnawih sual- inchhungkhura tharum thawhna leh vantlang nun tihbuaite a rem theih nan kum 1989 khan NLTP dan hi an siam a, tunah hian siam danglam a ni dawn em tih monsoon session-ah hian sawi ho a ni.
Zu khap chungchang hi MLA Moatoshi Longkumer chuan sawi hawngin minister Temjen Imna Along leh advisor Dr. Kekhrielhoulie Yhome chuan an rawn thlawp a ni. Zu khap vang hian state chhungah zu a rem phah lo tih leh, a nih dan tur ang taka sawngbawl loh zu an in avangin zu in ṭhinten hriselna kawngah harsatna an tawk tih an sawi.
Nagaland MLA zinga NLTP Act hlawhchham thu sawitute chuan an dan hman lai chu zu zawrh tihtawp kawngah a hlawhchham tih sawiin, Assam-Nagaland ramriah dan phal loha zuar tam tak an awm tih an sawi. Heng MLA-te hian an dan hmanlai chu hmun ṭhenkhatah hlih niin heng hmunte hi uluk taka vil ni se an duh thu an tarlang.
Hetih rual hian MLA zingah dan hman lai siam ṭhat duh lo an awm ve bawk. Nagaland chu Kristian tamna state an nih avangin Kohhran leh tribal pawl hrang hrang duh dan zah turin sorkar chu an ngen a ni. Mahse sawi honaa thu sawi MLA 15 zingah dan siamṭhat leh ennawn duh lo tu hi pathum chauh an ni thung.
Nagaland chief minister Neiphiu Rio chuan an dan hman lai chu a ṭhatna lai leh ṭhat tawk lohna lai a awm tih sawiin, thingtlang lamah zu khapna dan chu hlawhtling thawkhat viau mah se khawpuiah dan phal loha zuar leh zu tawlh ruk a hluar sawt hle tih a sawi. Zu khapna dan an siamṭha dawn a nih chuan Kohhran leh khawtlang hruaitute rawn hmasak an ni dawn tih a sawi a ni.