Meghalaya : LoP nihna aṭangin Lyyngdoh a bang

Meghalaya legislative assembly-a Leader of Opposition (LoP), Ronnie V Lyngdoh chuan a nihna aṭanga banna a thehluh. Lyngdoh hi Congress MLA niin eptu hotu atan hian March, 2023 khan lakluh a ni.

Meghalaya Legislative Assembly Secretariat chuan Lyngdoh banna thehluh an pawm thu hi tarlangin, Thawhṭanni aṭang khan a banna hi dan anga pawm a ni tih an tarlang bawk. Lyngdoh banna thehluh hi Meghalaya assembly speaker, Thomas A. Sangma chuan a pawmsak.

Indian National Congress hian kum 2023 Meghalaya inthlan khan seat panga an la a, mahse MLA pathum - Dr. Celestine Lyngdoh, Charles Marngar leh Gabriel Wahlang te chuan tun thla tir lam khan sorkar lai National People's Party (NPP) an zawm san hnuah Lyngdoh hian MLA thlawptu ngai zat a neih tawh loh avangin LoP nihna aṭangin banna a thehlut ta a ni. Congress MLA dang, Saleng Sangma chu Tura bial aṭangin MP atan thlan tlin a lo ni bawk avangin Lyngdoh hi Congress MLA neihchhun a ni ta a ni.

Meghalaya assembly-ah hian Congress chuan MLA pakhat chauh an neih tak avangin MLA nei tlem ber an ni ta a, kum 2023 assembly inthlana seat 5 latu - Trinamool Congress chu eptu zinga MLA ngah ber a ni. TMC dawtah hian MLA pali awmna Voice of Peoples' Party an awm.