German leh Austrian Engineer ten Rel kawng siam hna thawk

Hmarchhak huam chhunga ruah sur, lei min leh chhan hrang hrang vanga rel tlan hun eng emaw chen khaihlak tawh chu siam ṭhat tumin Austria leh Germany Engineer te chuan ngawrh takin hna an thawk mek.

Rel kawng ṭhenkhat - Assam, Mizoram, Manipur leh Tripura kalpawhna te chu leimin avangin hun eng emaw chen rel tlan a khaih lak tawh a, Northeast Frontier Railway chuan siam ṭhaṭ hna hi a thawk ve reng bawk. NFR Chief Public Relations Officer Pranav Jyoti Sharma chuan, "Rel kawng te hi then fai a nih hunah lei min leh thil dang vangin zawh hleih theih lohin a awm leh fo ṭhin a, fur ruahtui a tlak mek avangin hnathawh chak a harsa hle a ni" a ti. Rel kawng te hi phah a nih hma hian a ram leilung te chu Railway Ministry hnuaia Research Development and Standard Organisation te chuan an zirchian thu a sawi lang bawk.

NFR Chief Administrative Officer Ajit Pandit chuan, “Rel kawng siam ṭhat hna chak zawka kalpui a nih theih nan hian Austria leh Germany aṭangin engineer chah luh an ni a, hnathawktu dangte nen chhun-zan zawmin ngawrh takin an thawk mek a ni” a ti. Hetihlai hian All-Barak Youth Students Association (ABYSA) te chuan rel kawng siam chungchangah hian hnathawh
ṭha tawk lo a awm niin an sawi a, Central Bureau of Investigation (CBI) chuitir an phut a ni. ABYSA hruaitu Baharul Islam Barbhuiya chuan, "Rel kawng siam nan hian cheng vaibelchhe 5,000 vel sen a ni a, kum 20 chhung vel zet hna thawh a ni, tichuan nikum November khan hawn a ni a, harsatna hi kan tawk zui nghal a ni" a ti. Bungraw hman te chu a ṭha tawk lo niin a tarlang bawk.

Guwahati-Lumding, Assam-Manipur leh Mizoram, Guwa-hati-Silchar rel kawng chhia hian tlang rama awm Tripura, Manipur leh Mizoram te chu nasa takin a nghawng mek a ni. Heng rel kawng te hi mamawh lakkhawmna kawng pawimawh an nih vangin a nghawng neih hi a lian tham hle a ni. Tunlaia ruahsur nasa avang hian hmarchhak hmun hrang hrangah National Highway leh kawngpui ṭhenkhat te chu leimin leh tuiliante avanga kal tlang theih lohin a awm nual a ni. Tripura-ah chuan thla khat chuang National Highway 44 kaltlang theih loha a awm tawh avangin lirthei tam tham tak an tangkhang mek a, mipui mamawh zualpui, ei tur, hriak leh thil dang te chu Bangladesh kal tlanga lakluh mek a ni. Harsatna tawh mek hi chinfel a nih thuai loh chuan harsatna lian zawk a thleng mai ang tih a hlauhawm thu thuneitute chuan an sawi.