Bhutan PM-in hmarchhak state te nena inzawmna ṭha zawk neih a duh

India leh a ṭhenawm ram Bhutan te chuan ramri leh inkalpawhna chungchangah inbiakna an nei. Union Minister of State for Home Kiren Rijiju chuan Pathianni khan Bhutan Prime Minister Tshering Tobgay chu hmuin hmalak dan tur an sawi dun a ni.

Ram pahnih aiawh te chuan Indo-Bhutan border chu ngaih pawimawh a ṭul thu an sawi bakah, Bhutan leh Indian te chuan insumdawn tawna lian zawk kalpui a nih theih nana hmarchhak state paltlanga kawngpui siam a nih theih nan hmalak an duh thu an sawi. Assam, Arunachal Pradesh leh West Bengal te nen cultural exchange programme hman a duh thu Bhutan chief minister chuan a sawi a ni. Rijiju chuan Bhutan nena inlaichinna ṭha zawk nei tur hian hmarchhak state te chu an pawimawh tih a sawi a, hmasawnna pawh a thlen ngei a beisei tih a sawi.

Union Minister of State for Home Kiren Rijiju hian ni hnih chama Bhutan a tlawh chhung hian mi pawimawh tak tak, Foreign Minister, Home Minister, Army Chief bakah Minister te a kawm a ni. Rijiju chuan Bhutan a pan chhan chu Indo-Bhutan border chungchang bakah ramri depa cheng hmarchhak mipuite himna ngaihtuaha kal a nih thu a sawi. Bhutan Prime Minister chuan hmarchhak state te nena inzawmna
ṭha zawk neih a duh thu Union minister hi lo hrilhin Cultural exchange bakah Arunachal Pradesh, Assam leh West Bengal te nena insumdawn tawnna mumal zawka kalpui a duh thu a sawi a ni.