Assam-ah chhiah tih pun a ni, tui lian avangin mi tam takin harsatna an tawk mek

Assam sorkar chuan Thawhlehni khan chhiah lak tih pun a nih tur thu a puang. Chhiah lak tih punna tur hi chi 129 zet a ni dawn a, 2nd schedule of Assam Value Added Tax Act, 2003 (Assam Act VIII of 2005) tlawh chhan a siam a ni. Chhiah lak tihpun tur zingah hian Chini, Buhfai, Damdawi leh automobile spare part te pawh a tel a ni.

Assam Amusements and Betting Tax Act, 1939 hmangin Entertainment tax pawh tihpun a ni dawn a, Cable TV neitute chuan chiah atan thla tin cheng 20 an pekbelh a ngai tawh dawn a, DTH (direct-to-home) hmang te chuan cheng 30 an chawibelh thung ang. LPG man pawh cheng 14 in a pung dawn a, Diesel leh petrol aṭanga chhiah lak pawh tih san a ni. Chhiah sangin a nghawng tur zingah hian lirhei leitute pawh a tuartu zingah an tel dawn a, Car bikah cc 1,000 chin chu a hma aiin cheng 3,000-in a to dawn a, chhiah atan cheng 6,000 an pek a ngai tawh dawn a ni.

State Finance minister Himanta Biswa Sarma chuan sorkar chuan leiba vaibelchhe 10,000 zet a nei tih a sawi a, Chief Minister Sarbananda Sonowal-a kaihruai sorkar chuan leiba titlem tur hian kawng hrang hrangin hma a la mek tih a sawi.

Tui lian avangin an buai

Tun hnaia Assam leh a chheh vela ruah nasa taka sur chuan tui lian a thlen leh mek a, mi 90,000 vel zet chu tui lian avang hian an buai hle. Tui lian hian District pali Lakhimpur, Dhemaji, Nagaon leh Jorhat district te a tibuai mek a, Assam State Disaster Management Authority (ASDMA)-in a tarlan dan chuan mi 90,500 vel zet te chu tuilian hian a nghawng a, mi ṭhenkhat chuan hmun hiam an pan niin a tralang.

ASDMA tarlan dan chuan Assam-a lui lian ber Brahmaputra chuan hmun ṭhenkhatah hlauhawm chhinchhiahna a pel tawh a, khaw awm dan a zirin a la sang chho zel thei tih a ni. Hmun tam takah chuan tuilian avang hian inkalpawhna a buai chho mek a, lei eng emaw zat chu tui lian hian a la tawh a ni. ASDMA chuan thlai chinna hmun hectare 4,100 zet chu a tui lian hian a chim tih an sawi a, thlai chin te hi a chhe hneh hle tih a tarlang. Tun Pathianni khan Guwahati leh a chheh velah ruah nasa takin a sur a, hmun ṭhenkhatah inkalpawhna a buai phah nia tarlan a ni bawk. He tih lai hian Kamrup Metropolitan district thuneitute chuan lawngte hmanga Brahmaputra luia bungrua leh mihring thirakai a him tawk lo tih sawiin, tihtawp nghal a nih thu an sawi.