Tripura-ah eptu party ten lungawi lohna lantir

Tripura-a eptu party Trinamool Congress te chuan Thawhṭanni khan state Chief Minister Manik Sarkar chenna kawtah lungawi lohna lantirin an pungkhawm. Lungawi lohna lantirtute chuan an state-in kawng hrang hranga harsatna an tawh mek chhanah state sorkar chu mawhphuttu a ni an ti a, hna thawk ṭha tawk loah an nghaih thu an sawi. Tripura-ah hian National Highway kaltlang theih loha a awm mek avangin, oil leh nitin mamawh lakhawm kawngah harsatna an tawk mek a, thenawm ram Bangladesh kaltlanga bungraw lakluh a ngai hial a ni.

Assam-Agartala National Highway kaltlang theih loha a awm mek avang hian Indian Oil Corporation Limited (IOCL) chuan Bangladesh kaltlangin Oil a thawn lut mek a, IOCL pawhin Dwaki Meghalaya aṭangin petrol, diesel leh LPG te a la lut bawk. Agartala-ah hian petrol litre khat cheng 200-250 te a hralh chhuah a ngai hial a ni. Tripura official-in a tarlan dan chuan lirthei 5,000 chuang zet chu NH 44-ah hian an tangkhang mek a ni. Kawng tlang hun tur hriat theih a la nih loh avangin harsatna lian zawk an tawh belh mek bawk. Heng zawng zawngah hian eptu party te chuan State sorkar chu mawh-phurtu a ni an ti a, inkal pawhna ngaipawimawh lo leh hma la chak tawk lo niin an sawi.