Website aṬangin Assam NRC data a bo
Assam-a National Register of Citizens (NRC) website-a NRC final list tarlan chu a vaiin hmuh theih lohin a bo.
Supreme Court-in nikum August thlaa NRC final list tihchhuah hi website-ah tarlang ngei ngei tura a hriattir angin official website, www.nrcassam.nic.in ah dah lan a ni. NRC list-a telh te leh telh lohte pawh an data kimchang nen dah vek an ni. Mahse heng data-te hi hmuh theih lohin an bo zui leh ta a ni.
Union home ministry chuan website aṭangin NRC data hi hmuh theih ni lo mah se a him vek tih sawiin, buaina hi chinfel thuai a ni dawn tih a sawi. NRC thuneitu lam pawhin website
aṭanga data bo chhan hi IT firm Wipro nena contract an ziah thar tawh loh vang niin an sawi bawk.
NRC state coordinator Hitesh Dev Sarma chuan data hi cloud service khawihtu, Wipro lamin an dah luh a ni tih sawiin, nikum October 19 thleng khan contract an nei tih a sawi. Mahse contract hi co-ordinator hmasa Prateek Hajela khan a tihthar pui tawh loh avangin nikum December 15 aṭang khan data te hi online-ah hmuh theih an ni ta lo tih a sawi.
Sarma chuan nikum December 24 khan charge a la ve chauh tih sawiin, January 30 khan state coordination committee meeting neih a ni a, Wipro hnenah pawh ngenna thawn a nih thu a sawi a ni. Wipro lamin an rawn
tihṭhat leh hunah, heng data te hi mipuite hmuh theih tura dahchhuah leh nghal a ni dawn tih Sarma chuan sawi bawk.
Hetihlai hian eptu party lam chuan website aṭanga National Register of Citizens data a bo vek hi thil mak leh thil ṭha lo tih tumna hmanrua a nih theih tih an sawi. Congress party chuan Registrar General of India-in official-a NRC final list a pawmpui hmaa data a bo vek hi thil mak tak a ni tiin, hemi chungchang hi rang taka enfiah turin an ngen.