Thingtlang khuaah lirthei luhtir vek a ni ang : Sonowal

Assam Chief Minister Sarbananda Sonowal chuan Thawhlehni khan an state-a thingtlang khaw hrang hrangah kum thum chhunga lirthei luh tir vek a nih tur thu a sawi.

Sonowal chuan Public Works Department (PWD) official te chu he mi atana roadmap siam tura tih an nih thu a sawi a, inkalpawhna
ṭha chu hmasawnna bulpui a ni a ti. Lirthei aṭang chhiah lak chu mipui ten ngaihpawimawh a ṭul thu sawiin, chhiah awl ruk emaw, chhiah tihchingpen chu tih loh tawp tur a ni a ti. Tun hnaia a kaihhruai sorkarin chhiah lak a tihpun chungchang sawiin, chhiah pek chu kan zavaia tih tur a ni a, khua leh tui kan nihna tilangtu a ni a ti a, chhiah chu state hmasawn nan leh leiba tihtlem nana tihpun a ni a ti bawk. Food and Civil Supply department chu thil man sang zel tur khuakhirh leh ven kawngah chak taka hma la tura a duh thu sawiin, mipuite harsatna siam lo thei ang ber kal a ngai a ni a ti. Chief Minister chuan medical facility leh infrastructure lamah te nasa taka hmalak mek a ni a ti a, Tinsukia district leh hmun danga doctor mamawhna phuhru tura hmalak mek a nih thu a sawi bawk. A kaihhruai sorkar hmalakna tarlangin, zirtirtu indaih lohna sukiang turin zirtirtu ṭhahnem tak lak an ni tawh tih a sawi a, zirna leh mipuite hriselna bakah inkalpawhna ṭha siam chu an ngaih pawimawh ber a nih thu a sawi a ni.

Chief minister chuaa Assam-ah hian Islamic State (IS) te laka mipuite an him theih nan hmalak mek a ni a, Assam Police Director General Mukesh Sahay chu cyber space lamah fimkhur leh zual tura thurawn pek a ni a ti. Bangladesh-a IS te chetna chu inzirna atana thil ṭha tak a ni a ti a, venhimna khauh zawka kalpui a
ṭul thu a sawi. Police leh security forces te chu hmanraw changkang ber bera thuam an ṭul thu sawiin, training pawh ṭha zawka kalpui a ngai a ni CM chuan a ti. Border Security Force (BSF) te chuan ramri an thlithlai reng a, pawikhawihna thleng thei lakah inven a ngai a ni a ti. Tun naia IS ten an video-a Assam an lam ri chu chiaina tur a awm lo a ni a ti a, nimahsela fimkhur taka kan inven erawh a ngai a ni Sonowal chuan a ti bawk.