Arunachal Pradesh-ah National Integration Youth Camp ṭan a ni

Arunachal Pradesh Deputy Chief Minister Kameng Dolo chuan Itanagar-ah National Integration Youth Camp a hawng. Ni ruk awh tur camp hi Arunachal Chapter of National Youth Project (NYP) ten an buatsaih a ni a, Dera Natung Government College auditorium-ah neih mek a ni.

Kameng Dolo chuan hmarchhak mite chuan India ram state dangah endawng kan tawk ṭhin a, hei hi tihtawp a hun tawh tak zet a ni. India khua leh tui kan ni a, ang khat vek kan ni a ti. Chi leh vun rawnga inthliarna hi inunauna tichhetu a ni a ti a, hmarchhak hnam hrang hrangte hnam zia leh tihdan te chu kan unau dangte pawh hian an hriat a ṭul a ni, chu chuan inunauna a thlen thei ang a ti. National Integration Youth Camp buatsaih a ni chu lawmawm a tih thu sawiin kal khawm te chu ṭangkai taka hman tum turin a fuih a, he hunah hian tribal culture leh ziarang te zir chhuak ngei tura a duh thu a sawi a ni.

Dolo chuan NYP Chairman Dr S.N Subha Rao hmalakna chu fakawm a tih thu sawiin, India ram map-a Arunachal Pradesh a chuan zel theih nana cultural exchange leh trip programme a buatsaih chu a fak hle a ni. He camp hian India mipuite zingah inpumkhatna te, inunauna te, inhmangaih tawnna te leh remna leh muanna te a pek ngei a rin thu a sawi bawk. State Power Minister Tsering Norbu Thongdok pawhin thusawiin, NYP te hmalakna chu fakawm a tih thusawiin, AP chhunga tribal hnam hrang hrangte zingah inpumkhatna leh inunauna ṭha zawk a thlen ngei a beisei thu a sawi.

Arunachal Chapter, NYP president H P Biswas, vice president leh senior journalist Pradeep Kr Behra bakah mi pawimawh ṭhahnem takin an telpui a ni.