Assam state leiba vaibelchhe 10,000 aiin a tam : Himanta Mipuiten chhiah tihpun an dodal

Assam Finance Minister Himanta Biswa Sarma chuan Ningani khan Congress sorkarin leiba a hnutchhiah chu cheng vaibelchhe 10,000 aia a tam zawk thu a sawi.

Sarma chuan state leiba hi cheng vaibelchhe 12,000 vel a tlin thu sawiin, leiba tihtlem nan hian nasa taka hmalak a ṭul thu a sawi. Minister chuan chhiah lak tihsan chu state sum harsatna sutkian nana kawng ṭha ber a nih thu sawiin, mipuite harsatna siam lo thei ang bera duan a ni a ti. Sarma chuan thil man sang lutuk tur veng tura hmalak mek a ni a ti a, he mi tur hian task force din a ni a, hetah hian Deputy Commissioner, Tax Superintendent leh Deputy Superintendent, Food and Civil Supply Department te chu telh an ni. Sumdang te chu chhiah tihsan remchangah hmangin thil man tisang lo tura ngen an nih thu a sawi a, dan bawhchhia te chu hrem an nih tur thu Sarma chuan a sawi bawk. Finance minister chuan an state-ah nakum April thla aṭangin Seventh Pay Commission hman a nih tur thu sawiin, state sorkarin sokar hnathawk hlawha a sen ral ṭhin chu cheng vaibelchhe 4,500-ah a pun chhoh tur thu a sawi a ni.

Hetihlai hian mipuite chuan BJP sorkar-in item 129 zetah chhiah 5-6%-a a tipung chu duh loin, lungawi lohna an lantir mek a ni.

Chhiah lak tihsan a nih vang hian Gas cylinder pakhat man chu cheng 14-ah a kai chho a, petrol man pawh pawisa 76 in a sang a, diesel man chu litre khatah cheng 1.67-a tihsan a ni. Chhiah lak tih san a nih avang hian state sorkar chuan cheng vaibelchhe 500 vel a hmuh belh beisei a ni.

Assam-a pawl hrang hrang leh political party te chuan chhiah lak tihsan chu an duh loh thu an sawi a, kawng hrang hrangin lungawi lohna an lantir mek. Congress chief minister hlui Tarun Gogoi chuan chhiah tihpun chu a dodal tih a sawi a, BJP sorkar chu mipuite harsatna siam lo tura a duh thu a sawi. Mipuite chuan BJP-ah rinna nghatin beiseina sang tak nen an thlir a, nimahsela tuna an chet dan en hian mipuite beisei chu a thleng lo a ni a ti.

APCC president-in-charge Ripun Bora chuan mipuite harsatna siam zawnga thutlukna siam chu thil ṭha lo tak a ni a ti a, damdawi leh thil engkim man a san chuan harsatna tawk tur chu mipuite an ni a ti.

June 27-a Cabinet meeting chuan chhiah lak tipung tur hian ruahmanna a siam a, hman zui nghal a ni. Chhiah lak tihpun duh lohna lantir hian nimin khan pawl hrang hrang te chuan lungawi lohna lantir an tum a ni. All Assam Students Union (AASU) president Dipanka Kumar Nath chuan sorkar chet dan chu a dem thu sawiin, mipuite chuan BJP chu danglamna thlen turin an beisei a ni. Chhiah lak tihsan chungchangah sorkar chuan mipuite hnenah chiang takin a sawifiah tur a ni a, chu chu mipuite pawhin an beisei a ni a ti. Assam Jatiyatabadi Yuba Chhatra Parishad te chuan lungawi lohna lantir an tum thu an sawi ve bawk.