Lumding-Silchar rel kawng hawng leh ta

Leimin leh ruahsur nasa tak avanga thla hnih chhung zet khar a nih tawh hnuah Lumding-Silchar inkar rel kawng chu hawn a nih leh tawh thu Northeast Frontier Railway (NFR) chuan a tarlang.

Northeast Frontier Railway (NFR) chief public relations officer (CPRO) Pranav Jyoti Sharma chuan rel kawng metre 300 vel zet siam ṭhat a ni a ti a, hna hi chhun zan zawma ngawrh taka thawh a ni a ti. Hnathawktu 500 vel zet an awm a, cutting machine, dumper leh excavator te hmangin hnathawh a ni. Hmun tam takah leiminin rel kawng a tihchhiat avangin rel kawng dang sial a ngai hial a, tunnel siam belh a ni bawk. Geo-technical expert te chuan hnathawh hi a hmunah an vil reng a ni. April 27 khan he rel kawng hi khar lailawk a lo ni tawh a, May 6 khan hawn leh niin, May 13 vek khan leimin avang bawkin khar a ni leh ta a ni. He rel kawng hi Assam chhim lam, Tripura, Mizoram leh Manipur te kalpawhna a nih bawk avangin harsatna tawh hi a namailo hle. Northeast Frontier Railway thuneitute chuan rel kawng hawn theiha a awm leh ta chu lawmawm an tih thu an sawi a, mipuite tawrhna zawng zawng an hriatthiampui thu an tarlang a ni.