Gohain an Raha-ah AIIMS din a duh

Union Minister of State for Railways leh Lok Sabha MP ni bawk Rajen Gohain chuan Ningani khan All India Institute of Medical Sciences chu Nagaon district-ah dah a duh thu a sawi.

Gohain chuan AIIMS hi Lower Assam Changsari-a dah lo tur leh Raha-ah dah a duh thu hi a sawi a, chu chu Assam chauh ni lo hmarchhak state te tan pawh a ṭang-kai zawk dawn niin a sawi. Raha-ah AIIMS hi din a nih theih nan minister chuan hma a lak tur thu a sawi a, He mi chungchangah hian central minister te a hmuh tur thu a sawi a ni.

June 28 khan state sorkar chuan AIIMS din nan hian Changsari-ah acre 571 zet a zau a pe a, a sak nan hian cheng vaibelchhe 1,000 ruahman a ni. Hei hi duh loin Raha mipuite chuan AIIMS chu an chenna hmunah ngei din a nih theih nan state sorkar an lo nawr ve mek bawk. Sorkar chuan Raha-ah hian All India Institute of Ayurveda chu din a nih tur thu sawi mah se mipuite chuan AIIMS din an duh thu hi an au chhuahpui ve reng a ni. He an thil phut hi All Assam Student’s Union, Tiwa Students body, AJYCP, Congress, Kooch Rajbangshi Sanmilani, Tai Ahom Students body leh Bengali Samaj te chuan an thlawp thu an sawi tawh bawk. Lok Sabha MP Rajen Gohain bakah hian BJP MP Ram Prasad Sarmah chu state sorkar thutlukna dodal zingah hian a tel ve bawk.