Assam-ah tuilian avangin Mi nuai khat chuangin harsatna tawk

Assam state-ah tuilian avangin mi mi nuai khat chuang te chuan harsatna an tawk mek a, mi tam tak chuan an in leh lo an chhuahsan tawh.

Tuilian hi Lakhimpur, Nagaon, Golaghat, Morigaon, Biswanath, Barpeta leh Jorhat district chhunga thingtlang khaw 213-a cheng, mi 112,307 ten an tuar mek niin Assam State Disaster Mangament Authority oficial chuan a sawi.

State meteorological department chuan ruah hi a la sur chhunzawm zel dawn nia a sawi avangin tuilian hian ziaawm lam a la pan mai rih dawn lo nia sawi a ni.

Official chuan Jorhant, Golaghat leh Lakhimpur district-te chuan tuilian vang hian harsatna an tawk nasa zual a, tuilian tuarte awm lailawkna turin thuneitute chuan relief camp paruk an siam tawh a ni. District thuneitute chuan tuilenna bial hrang hrang tan chhawmdawlna pe turin an ngen.

State sorkar chuan tuilian hian thingtlang khaw tam tak a chim bakah, thlai chinna ram hectare 6,978.63 a zau a chim niin a sawi.

Jorhat leh Dhubri district-ah Brahmaputra lui chuan hlauhawm chhinchhiahna a pel a, Sivsagar-ah Dikhaw lui pawh hlauhawm chhinchhiahna chung lam ni tawhin, Golaghar leh Numaligarh-ah Dhansiri lui pawh a lian nasa tawh hle.

Jorhat-ah chuan tuilian vang hian mi 35,000 ten harsatna an tawk mek a, thingtlang khua 20 zet te chu tuilian hian a chim mek a ni. West Jorhat-ah chuan Bhogdoi lui lian avangin mi tam takin an chenna in an chhuahsan a, an ranvulh eng emaw zat chu chin hriat lohin an awm mek.

Deputy commissioner Roshni Aparanji Korati chuan tuilenna hmun hi a tlawh a, mipuite chu hmun him lamah insaseng turin a ngen. Bhogdoi hian hlauhawm chhinchiahna a pel tawh a, tui hi a len belh zel theih thu thuneitute chuan an sawi. Jorhat-ah hian tuilian avang hian mi pathum chuan nunna an chan tawh a, hliam eng emaw zat te chu Jorhat Medical College leh Hospital-ah te dahluh an ni.

Kaoimari, Gelekoni leh Sumonimora thingtlang khua te chuan Jhanji lui lian avangin harsatna hrang hrang an tawk a, Majuli District-ah chuan thingtlang khua 24 zet te chu tuilian vang hian an buai hle bawk. Mipui ten tuithianghlim in tur an thla chham a, inkalpawhna chhia a awm nual bawk.

Assam hian kumtin tuilian avangin harsatna a tawk ziah a, mi tam takin nunna an chan phah bakah in leh lo chan eng emaw zat an awm bawk. State-a party lian pahnih BJP leh Congress te chuan inbeih nan an lo hmang fo tawh a, sorkar laipui chu state mipuite himna ngaipawimawh tawk lohah puh a ni fo bawk.

Chief Minister Sarbananda Sonowal chuan Inrinni khan an state-in tuilian a tawrh mek chungchang chu thlirin high level meeting a ko a, department hrang hranga official-te chu a ṭul anga chhawmdawl hna chak taka kalpui turin a ti. Sonowal chuan tuilian tuar mek, inkalpawhna chhia avanga tlawhphawh theih loha awmte pawh chhawmdawlna pek dan ngaihtuah turin senior official-te a hrilh bawk.

CM chuan Health and Family Welfare Department hnenah tui aṭanga hri darh thei tur veng tura theihtawp chhuah tur te, damdawi pawh tlachham lo tura chhekkhawl tur tein a hrilh a, Public Health Engineering Department hnenah tuilenna bial chhungah tui thianghlim pe turin a hrilh.

Sonowal chuan Chief Secretary hnenah tuilenna district hrang hrangah Deputy Commissioner-te hnenah tuilian tuarṭanpui ngaite hnenah an mamawhte pe tura hriattir turin a hrilh a, hei bakahhian DC-te chu tuilian tuarte chhanchhuah hna thawkna atana lawng an mamawh ang zat tur kawl reng tura hriattir turin a ti bawk.