Political party te'n bang turin CM Ibobi an phut

Manipur-a political party te chuan Manipur Regulation of Visitors, Tenants and Migrant Workers (MRVT & MW) Bill, 2015 duh lohna lantirnaah Joint Committee on Inner Line Permit System (JCILPS) te an thlawp thu sawiin, Chief Minister Ibobi Singh bang turin an phut.

Manipur-a pemlutte khuahkhirhna atan rua­hman, MRVT & MW Bill 2015 hi March 16 khan state assembly-ah pass a ni.

Manipur People Party (MPP) chuan bill chu sawiselin, Governor chu bill pawmpui lo turin an ngen a, hetihlai hian Janata Dal (United) and CPI(ML) te pawhin bill chu Act anga hman a nih hmain ennawn an phut bawk.

"Bill pass a nih danah MPP chuan Chief Minister leh a kaihhruai sorkar a dem hle a, an nihna aṭangin an ban a ngai a ni," tiin MPP president Sovakiran chuan a sawi.

JD(U) chuan pemlutte khuahkhirhna chung­chang zirchiang tura state sorkarin a ruat, All Political Parties Committee on Inner Line Permit System-in rawtna a siamte chu a duhdana her dang­lamah Chief Minister an puh bawk a, state sorkar chuan committee rawtna chu a takin pakhat mah a tipuitling lo a ni, an ti.

CPI(ML) chuan pemlutte khuahkhirhna atana dan thar an siam, MRVT & MW Bill chu office thar leh hna thar siamna chauh a ni, tiin pemlutte khuahkhirhna tur thil thar engmah a awm lo a ni, an ti.

Hetihlai hian JCILPS chuan bill an duh loh lantir nan ngawrh zawka nawrh huaihawt an tum thu an puang.

JCILPS chuan tual­chhung mite pemlutte hnena an in luah tir lo tur leh an hnena engmah hralh lo turin an ngen a, state chhunga pemlutte chu thil zawrh emaw sumdawnna eng thil mah kalpui lo tura dan an tum bawk.

JCILPS chuan MRVT & MW Bill chu leilung fate humhalhna tur a ni lo, tiin state sorkarin a hnuhkir hma chu nasa zawka nawrh chhunzawm zel an tum thu an tarlang bawk.