Union cabinet-in hmarchhaka hydro project tan Rs vbc 4,136 pawm

Prime minister Narendra Modi kaihhruaia Nilainia union cabinet meeting chuan Ministry of Power-in hmarchhak state hrang hranga hydroelectric project tihhmasawnna atana rawtna a thlen chu a pawmsak.

Cabinet thutlukna siam meeting zawhah information and broadcasting minister Ashwini Vaishnaw chuan a sawi chhuak a ni.

He hmalakna hi North East Region (NER) hnuaia state sorkarte leh Central Public Sector Undertakings (CPSUs) ten joint venture company hmangin an thawk ang. Scheme atan hian Rs vbc 4,136 ruahman niin, fiscal year 2024-25 aṭanga 2031-32 thleng kalpui a ni ang. Hemi hmang hian hmarchhak biala hydroelectric project, megawatt 15,000 vel pek chhuahna chu tihchangtlun a ni dawn a ni.

Fund hi Ministry of Power-in NER tana Gross Budgetary Support (GBS) a dah aṭanga 10% hman a ni ang. NER-a state sorkarte equity share chu total project equity aṭanga 24% ah bithliahin, a tam berah project khatah Rs vbc 750 a ni ang. A ṭul dan azirin bithliah zat hi ennawn ṭhin a ni dawn a ni.

Power Ministry chuan he scheme hmang hian state sorkarte chu hydro development lama tha thawhin, mawhphurhna pawh awmze mumal nei zawkin an keng tlang thei dawn a ni, a ti. State sorkarte chu stakeholder an nih chuan project thawhna atana ram hman, ram neitute tana ruahmanna siam leh tualchhung dan leh thupek lama harsatna awm thin pawh a ziaawm phah ngei dawn niin a tarlang.