Nagaland : State sorkarin ENPO leh sorkar laipui nena inbiakna neih beisei

Nagaland sorkar chuan Frontier Nagaland Territory (FNT) buaina chungchangah Eastern Nagaland Peoples' Organisation (ENPO) team leh sorkar laipui nen inbiakna neih theih an beisei tih a sawi.

State sorkar hnuaia Political Affairs Committee (PAC) meeting an neih hnuah, Nilaini khan sorkar thupuangtu KG Kenye chuan ENPO hruaitu thar, team thar chuan sorkar nena inbiakna neih an hreh loh thu pawh an tilang tawh a ni, a ti.

Meeting-ah hian sokar laipui leh ENPO in inbiakna an lo neih tawhte pawh sawi a ni. ENPO hian hruaitu thar an neih hnuah pawh team hmasain sorkar laipui nena inbiakna an lo ṭan tawh chu an rawn chhunzawm ve leh nghal a ni.

ENPO team thar hian Nagaland chief minister Neiphiu Rio pawh hmu tawhin, sorkar laipui nena inbiakna an neiha rawtna an siam ngaihtuahnaa state sorkar aiawh tel tir turin an ngen a ni. Hei vang hian nikum aṭanga kalpui theih an lo beisei tawh, party pathum- state sorkar, sorkar laipui leh ENPO aiawhte inbiakna, 'tripartite talk' chu an neih theih a beiseiawm ta niin CM chuan a sawi.