Meghalaya unemployment rate a hniam 2028-ah hna nuai 5 siam belh hman tum

Meghalaya-a hna thawh nei lo, unemployment rate chu 2.98% niin, ram pum huap aiin a hniam hle. Ram pum huapa unemployment rate hi 6.78% a ni.

Deputy chief minister Preston Tynsong chuan Meghalaya assembly session neih mekah hei hi Centre for Monitoring Indian Economy (CMIE) data thar bera tarlan a ni tih a sawi chhuak. Hemi rual hian Periodic Labour Force Survey (PLFS), 2023 ah chuan Meghalaya unemployment rate hi 6% tih a ni a, mahse hei hi financial year 2024 nen chuan a inmil tawh lo tih a tarlang.

Assembly Autumn Session an neih mekah UDP MLA Lahkmen Rymbui special motion put luh a chhannaah, Tynsong chuan kum sarih chhung, 2017 aṭanga 2024 thlengin Meghalaya-a hna thawh nei lo, unemployment rate chu a tlahniam zel a ni, a ti. A san ber chu 2017-18 niin 8.8% a ni a, a hniam lai ber chu 2021-22-ah 1.9% a nih thu a sawi.

Dy CM chuan kum 2028-ah chuan hna nuai 5 siam belh hman an tum tih a sawiin, heng zinga 230,000 chu agriculture leh a kaihhnawih sector-ah a ni ang, a ti. Sumdawnna, hotel leh transportation kaihhnawih lamah 150,000, construction leh manufacturing-ah hna thar 53,000 leh 23,000 bakah mining, electricity leh real estate-ah hna thar 10,000 siam an tum tih a sawi bawk. He an ruahmanna tihlawhtling tur chuan skill development, entrepreneurship, advanced skills and innovation, international opportunities leh self-employment lamah hmalakna felfai tak neih a ngai dawn tih a tarlang.