Tripura sorkarin central team tir turin a ngen

Tripura sorkar chuan tun hnaia an state-a tuilianin chhiatna a thlen dante a hmuna enfiah tura inter-ministerial central team tir turin sorkar laipui a ngen.

State chhunga tuilian hian ziaawm lam a pan tawh a, tuilian vanga relief camp-a khawsa pawh an tlahniam tawh a ni. Tuilian a nasat lai khan mi nuai 1.2 vel chu relief camp 471-ah an khawsa a mahse, niminah chuan relief camp-a khawsa hi mi 70,000 ah a tlahniam tawh a ni.

Hetih lai hian tuilian tuar nasa ber, Gomati leh Sepahijala district-ah chuan tuilian tuarte ṭanpui leh chhawmdawl hna hi State Disaster Response Force (SDRF) leh National Disaster Response Force (NDRF) team-te chuan ngawrh takin an la thawk reng a, volunteer 500 velin an pui bawk.

State chhunga tuilian vang hian mi 26 in nunna an chan a, mi pahnihin hliam na tak tuarin, chin hriat lohin mi pakhat a la awm mek bawk.