Maghalaya-in Fifth Pay Commission hmang dawn

Meghalaya sorkar chuan fifth pay commission hman a remti a, hun rei tak chhung fourth finance commission an hman hnuah sorkar chuan Fifth Pay Commission hmang tur hian ruahmanna a siam ta a ni.

Kar kalta Ningani khan Chief Minister Mukul Sangma kaihhruainain cabinet meeting neih a ni a, January 1, 2007 aṭanga an hman tawh fourth finance commission chu dah ṭhaa Fifth Pay Commission hman hi an remti a ni. Finance department chuan fifth pay commission hman a nih theih nan hian rawtna a thlen a ni. Fifth Pay Commission-ah chief secretary hlui P.J. Bazeley chu chairman atan ruat a ni a, NEC secretary hlui Uttam Kumar Sangma leh Education official L. Roy te chu member an ni ang.

Chief minister chuan Fifth Pay Commission hman thuai a nih theih nan hian chak tak hmalak a ni a ti a, pay commission-in rawtna a siam te chu cabinet pawmpui tura peihfel vat a ni ang a ti. Finance department chuan Meghalay-ah hian sorkar hnathawk 55,860 an awm tih a sawi a, heng mite hlawh leh thil dang te tihsan a ni dawn a, he mi vanga sorkar-in sum a sen belh tur chu vaibelchhe 400 niin a tarlang. Fifth pay commission hman a nih chuan sorkar hnathawk hlawh chu 25% in a pung ang a, state sorkar chuan thla tin vaibelchhe 100 vel a sen belh tawh dawn a ni.

Hetih lai hian Meghalay sorkar hian sum leh paiah harsatna a tawk chho mek a, National Green Trubunal-in hun rei tak lungalhthei khur a thununsak avanga an sum hloh chu a namai lo hle. State sorkar-in lungalhthei aṭanga chhiah a lak tihtawp lailawk a nih avang hian an sum tam tak a hloh mek a ni. Tunhnai khan State Planning Board chu an ṭhukhawm a, an state sum harsatna sutkian dan tur an ngaihtuah a ni. State Planning Board chairman John F kharshiing chuan, kum 2014-15 chhunga chhiah lak chu vaibelchhe 343 a ni a ti a, NGT-in lungalhthei a khuakhirhsak avangin chhiah aṭanga an sum hmuh a tlahniam hle tih a sawi. Kum 2015-16 chhunga an chhiah hmuh hi vaibelchhe 228-ah a tlahnim a ni.

Kharshiing chuan sorkar department te chu an sum hman ral 20%-a tihniam tura tih an nih thu sawiin, kum 2016-17 chhungin chhiah aṭangin vaibelchhe 1268 hmuh beisei a ni a ti. State-in Central share
aṭanga a sum hmuh chu kum 2015-16 khan vaibelchhe 1202 .99 a ni a ti a, hei hi kum 2014-15 aiin a tlem zawk a ni a ti. Meghalay tan hian sorkar laipui aṭangin MGNREGS kalpui nan vaibelchhe 221 ruahmansak an ni a, heng bakah hian sorkar laipui scheme Sarva Siksha Abhiyan vaibelchhe 166 bakah Integrated Child Development Scheme (ICDS) atan vaibelchhe 124 te ruahman sak an ni. Kharshiing chuan state dang te aiin an sum hmuh chu a beitham niin a sawi.