Manipur-in Anti-migrant bill pharh leh dawn

Manipur sorkar chuan an state-a pem luh tumte tana dan a siam chu President in a hrensak avangin assembly lo awm turah bill thar pharh leh a tum. He thutlukna hi Inrinni-a Chief Minister O Ibobi Singh-a office-a all party meeting neihah an siam a ni.

Manipur Assembly-a pass tawh, Protection of Manipur People Bill, 2015 bakah bill dang pahnih, The Manipur Land Revenue and Land Reforms (7th amendment) Bill 2015 leh The Manipur Shops and Establishment (2nd amendment) Bill, 2015 te chu President Pranab Mukherjee pawmpui tur hian thawn a ni a, mahse tun thlengin President hian pawmpuina la pe loin, siamṭhat tura tih a ni.

Assembly-a bill thar pharh tur hi 'Manipur Local People's Protection Bill, 2016' tiha thlak rawt a ni a, base year atan a hmaa 1951 tih pawh 1972 tia thlak rawt a ni bawk. CM Ibobi Singh chuan bill thar siam tur hian Manipur leilung fate venghimin a humhalh tlat dawn a ni, a ti.

President-in bill a hnawlsak avang hian hrensak Manipur-a party hrang hrangte chuan bill hi siamṭhat an remti a ni. Drafting committee atan CM Ibobi dah a ni. Bill thar tur hi duanfel a nih hnuah political party hrang hrangte leh legal expert-te hnenah entir phawt a ni ang a, hemi hnu hian thutlukna siam a ni ang. An bill duan hi Manipur-a Inner Line Permit system hman a nih theihna tura hma la tu, JCLIPS bakah Joint Action Committee againt Anti-Tribal Bill-te pawh entir an ni ang.

Hetihlai hian tualṭo party ṭhenkhat chuan bill thar siam tur hi a hmaa mi ang bawk a nih an rin thu an sawi. State Communist Party of India (CPI) Secretary, M. Nar chuan Assembly-in a lo pass tawh bill pathumte chu tribal-te chuan an duh loh thu sawiin, bill chungchangah state mipuite an lungrual theih loh avangin sorkar laipui pawhin a remtihpui thei dawn lo a ni, an ti. Bill thar duan chu state mipui pumpuiin an pawm theih tur a ni tur a ni, a ti.

Manipur People's Party president, N Sovakiran pawhin bill thar siam an tum hun chu a tlai tawh mah nia a ngaih thu a sawi. "Nakkum February thlaah inthlan neih a ni dawn a, official ṭhenkhat chuan kumin December thlaah sawn hma a ni mai thei tih pawh an sawi a ni. Hei vang hian he bill hi sorkar laipui lamah thawn a nih meuh chuan Manipur-ah chuan sorkar thar a lo ding hman tawh dawn a ni" a ti.

Janata Dal (United) president Tombi chuan centrla lama an party hruaitu liante chu Manipur-a Inner Line Permit system kalpui a nih theih dan chungchang an sawipui dawn tih a sawi.