Manipur Nurse ten khawvel hriat an hlawh

Manipur nurse te chuan an hming an chher chho zel a, mamawhna pawh a sang chho zel. Tunah chuan ram chhung chauh ni lo khawvelin Manipur nurse a mamawh tawh nia tarlan a ni.

Manipur nurse te hi an dawh theihna, an zaidamna leh an taimakna avang tein mite ngaihven an ni mek. Tunhnai khan Japan sorkar chuan Manipur Chief Minister Okram Ibobi Singh hnenah ngenna thlenin, Japan-a Hospital hrang hranga thawk tur nurse 15,000 thawn turin ngenna a siam a ni. Japan sorkar bakah hian Trinidad and Tobago leh Latin American ram te chuan Manipur nurse an mamawh thu hi an sawi ve leh tawh. Heng ram te hian Manipur sorkar chu an ramah nurse 100 vel thawn turin an ngen. Director of Health Services, Dr O Ibomcha chuan hemi chungchangah hian Trinidad and Tobago Director General, Health Ministry
aṭanga ngenna an dawn tawh thu hi a sawi.

Dr O Ibomcha chuan March-a Yaoshang festival hman a nih ṭum khan phone hmangin ngenna hi kan dawng tawh a, nimahsela Union Ministry of External affairs kaltlanga ngenna siam tur hian thurawn pek an ni a ti. An nurse te himna chu an ngai pawimawh tih a sawi bawk. Trinidad and Tobago sorkar chuan nurse te hi thla khatah cheng nuai aia tlem lo hlawh pek a tiam nia hriat a ni. Trinidad and Tobago-ah hian kum 2011 chhiarpui khan mi 1,328,029 vel an cheng a ni.

Manipur-ah hian May 13 khan International Nurse Day hi Jawaharlal Nehru Institute of Medical Sciences-ah ropui taka lawm a ni a, he hun hi Chief Minister O Ibobi Singh chuan a hmanpui. O Ibobi Singh chuan Japanese embassy
aṭanga ngenna an dawn thu hi sawi chhuakin, nurse te hi an hnathawh ṭhat avanga sawm an nih thu a sawi. Manipur nurse te hi India ram chhung hmun hrang hrangah hnathawkin an awm a, an taimakna te, an zaidamna leh an thiamna te chuan mi ngaihven an hlawh hle. Manipur-ah hian Regional Institute of Medical Science, Shija Hospitals and Research Institute bakah private nursing college eng emaw zat a awm a ni.