Bangladesh aṭangin Assam-ah hel an lut nia hriat a ni Venhimna khauh zawkin kalpui

Assam police DGP Mukesh Sahay chuan intelligence report an dawn chungchangah mipuite tan chiaina tur a awm lo a ni a ti. Tunhnaia ṭhenawm ram Bangladesh-a pawikhawihna rapthlak tak a thlen hnuah, ramri uluk zawka veng tura thupek chhuah a nih hnu lawkah, Jihadis mi panga vel te chuan Assam an lut nia sawi a ni.

He mi chungchangah hian Thawhṭanni khan Guwahati-ah press conference neih a ni. Sahay chuan,“Assam chhungah Jihadis mi panga aṭanga mi 10 vel bawr lut anga sawi chu finfiahna awm lo a ni, fimkhur erawh a ngai a ni" a ti. State chhunga venhim hna thawktute chu hriattirna pek an ni a, mipuite chu chiai lo tura ngen an ni bawk. Jihadis te hian Assam leh Meghalaya inrina bawr vel an pan nia sawi a ni a, police te chuan finfiah tumin an bei mek a ni. Chief Minister Sarbananda Sonowal chuan venhimna khauh zawka kenkawh a nih theih nan security leh police aiawhte a titipui tawh bawk.

Hetihlai hian Assam Police te chuan Jammat-ul Mujahiddin Bangladesh (JMB) mi leh sa zawn chhuah beihpui an thlak mek. JMB mi leh sa an zawn te hi 11 an ni a, an zinga pathum te chu Assam ram chhungah an awm nia hriat a ni a, midang zawng chu Bangladesh-ah an awm nia sawi a ni. Police te chuan District thuneitute chu fimkhur tura chah an ni a, JMB mi leh sa te hi Bangladesh-a pawikhawihna rapthlak tak thlentirtute nena inzawmna nei nia sawi an ni. October 2, 2014 khan JMB te hian Bangladesh-ah hian pawikhawihna liam tham tak an lo thlen tawh a ni.

JMB te hian Chirang district-ah camp an nei a, he hmunah hian training ṭha tak an nei ṭhin. An camp awmna hriat chhuah a nih hnu hian Security Force te chuan an tihchhiatsak a ni. Meghalaya police te chuan hel te hi South Garo Hills border aṭangin India an rawn lut niin an sawi a, western Meghalaya, lower Assam leh Guwahati te chu venhimna khauh zawka pek ngai zual niin an sawi bawk.