Monika chunga thil theng chhui chiang dawn

Manipur nula Monika Khangembam chuan Indira Gandhi Interna-tional Airport-ah Immigration officer chet dan mawi lo tak avangin harsatna a tawk a, sorkar laipui chuan he thil thleng chungchang hi chhui chian a nih tur thu a sawi.

Monika hi South Korea zin tur a ni a, Delhi Airport-a Immigration officer chuan vun rawng vangin hmusit takin a
ṭawng khum nia sawi a ni. Minister of State for Home Kiren Rijiju chuan he thil thleng hi sorkar chuan a ngai thu tak hle a, chhui chian a ni ang a ti. Singh chuan hnam leh vun rawng lam hawia inhmuhsitna chu Prime Minister Narendra Modi-a kaihhruai sorkar chuan a ngai thutak hle a ni a ti a, a bikin hmarchhak miten harsatna an tawh ṭhin chu titawp tura hmalak a ni a ti.

Monika Khangembam hi a laka thil thleng chungchangah hian thu zawh chian a ni a, Ministry of External Affairs-ah thlen tum a ni.

Khangembam farnu Mensy chuan, "Ka u hi immigration officer chuan khawi ram aṭanga lo kal nge tih a zawt a, ka u chuan ṭap chungin Indian passport chu a hmuh a, officer chuan deusawh leh tiel takin a chhang a, a hmusit hle a ni. Ka u laka thil thleng ang hi tun hnuah chuan thleng tawh lo se kan duh hle a ni" a ti. Officer hian Monika hi India a nihna chiang tur te, India ramah state eng zat nge awm tih te a zawh bakah a nuihsawh vel nia sawi a ni. He thil thleng chungchang hi July 9 khan Facebook-ah post a ni.

Monika hian Seoul
aṭanga a let leh hnu hian IGI airport thuneitute hnenah Immigration officer hi tunge a nih zawng chhuak turin a ngen a, anni chuan an zawn chhuah theih loh thu leh CCTV aṭang pawha en let theih a nih loh thuin an lo chhang a ni. External Affairs Minister Sushma Swaraj chuan he thil thleng hi chhuizui a nih tur thu a puang.