Tripura panna kawngpui a tlang ta

Tripura chuan thla thum chhung zet kawngpui chhia avanga harsatna a tawh hnuah kawngpui te chu lirthei chikim kal tlang theiha siam a ni leh ta.

Motor kawngpui bakah hian rel kawng te chu thenfai leh tawh a ni a, dan pangngaia tlantir leh a ni ang. Hun rei tak chhung National Highway 4 kaltlang theih loha a awm avang hian Assam-Agartala inkarah lirthei sang chuang an tangkhang a ni. Transport official chuan buhfai phur truck leh oil tanker 68 vel te chuan Thawṭanni khan Tripura an thleng tawh a, an thlen belh zel beisei a ni a ti. NFR Chief Public Relation Officer Pranav Jyoti Sharma chuan bungraw phur rel te chuan Tripura an lut leh tawh tih a sawi bawk.

Chakkhai lamna ber kawngpui a chhiat avang hian Tripura hian harsatna a tawk nasa hman hle a, thil man a san bakah nitin mamawh lei tur a vang hle. Mamawh zualpui te chu Bangladesh kaltlanga chawk luh ni mahse thil man a sang em em a, an harsatna tawh hi a namai lo hle. Thla thum dawn National Highway kaltlang theih loha a awm avang hian sorkar laipui chuan dem a hlawh hle bawk a, eptu lam te chuan hmarchhak mipuite harsatna ngai pawimawh tawk loah sorkar an puh a ni.