Tripura MLA paliin Covid-19 kai tawh

Tripura-a rorellai party,  BJP MLA Asish Kumar Saha chu Covid-19 a kai tih hmuh chhuah a ni a, MLA zingah hri kai hmuh chhuah palina a ni. 

Saha chuan hri a kai thu hi sawiin, Covid-19 symptoms a neih avangin Inrinni khan a sample test a ni a, a result hi a positive tih a sawi. Inah inkhung hrangin, in enkawl dan tur kaihhruaina an siamte a zawm tih a sawi bawk. Tun hnaia amah hnaihvaite chu inkhung hrang a, in test ve nghal turin a ngen bawk a ni. 

July 22 khan BJP MLA Ramapada Jamatia chuan hri a kai tih hmuh chhuah niin, legislator zingah hri kai hmuh chhuah hmasa ber a ni. Hemi  hnu hian August 1-ah IPFT MLA Dhananjoy Tripura leh, August 22-ah BJP MLA Mimi Majumder-ten hri an kai tih hmuh chhuah leh a ni. 

Tripura-ah hian hri kai an la pung chak hle a, sorkar data tihchhuah hnuhnung berah chuan Agartala Municipal Corporation (AMC)-a ward pakua chhungah positive punna hi a sang zel a, 21% a tling pha a ni. Hetih lai hian state puma positive rate chu 3.86% a ni thung. 

Chief minister Biplab Kumar Deb chuan khawpuia hri kai pun chakna chhan pakhat chu hri darh tur venna atana sorkarin kaih­hruaina a siam, social distan­cing leh a dangte zawm ṭhat a nih loh vang niin a sawi. Tuna an dinhmun tawn mek chu a hlauthawnawm hle tih sawiin, mipuite chu a ṭul tawpah lo chuan pawn chhuak lo tur leh, an chhuak a nih pawhin social distancing dan chu zawm vek turin a ngen. 

State chhunga  hri kai hmuh chhuah tawh hi mi 10,876 an tling tawh a, an zinga 7,037 chu enkawl dam ni tawhin, mi 94 chuan an thihpui tawh a ni.