Assam : Hri kai hmuh thar zingah minister leh MLA pathum tel

Assam-a Covid-19 kai hmuh chhuah thar zingah Hill Areas Development Minister, Sum Ronghang leh BJP MLA pathum an tel. Ronghang hi minister zingah hri kai  hmuh hmasak ber a ni.

MLA hri kai  hmuh chhuah hi 20 an awm tawh a ni. Minister Ronghang hian hri a kai tih a inhriat hnuah a office lamah hriattir loin private hospital-ah a lut nghal a, hei hian sawisel a hlawh hle. Official chuan minister hian a hri kai chungchang hi a zep tur a ni lo tiin, a driver leh PSO pawh test an nih hnuah an positive tih a sawi. 

Ni li awh tur Assam Assembly Autumn Session chu vawiin aṭang hian neih tum a ni a, hei vang hian hri laka invenna turin Assembly Secretariat-a thawkte leh, session-a tel turte chu RAT hmanga test neih sak vek an ni. Test neihnaah hian mi 14-in hri an kai tih hriat a ni a, an zingah hian journalist leh MLA te pawh an tel.

Chief minister hlui leh Congress hruaitu, Tarun Gogoi pawh August 25 khan Covid-19 a kai tih hriat a ni a, Gauhati Medical College and Hospital-a enkawl mek a ni. Assam-a coronavirus kai hmuh chhuah tawh hi 1,01,367 an tling tawh. Inrinni liam ta khan hri kai hmuh chhuah thar mi 2,560 an awm leh a, an zinga 562 chu Guwahati khawpui chhunga mi an ni. Hri kai hmuh tawh zinga 81,070 chu enkawl dam ni tawhin, mi 286 in an thihpui tawh thung.