Nagaland Assembly-in vote-on-account a pass
Nagaland Assembly chuan Ningani khan financial year thar, 2015-16-a thla li chhung sum hman tur cheng vaibelchhe 3868.16 chu vote-on-account-in a pass.
April 1 aṭanga July 31, 2015 thleng sorkar department 82 te senso tur hi voice vote hmanga pass a ni.
Speaker Chotisuh Sazo chuan vote-on-account chu member te vote tura chhawp chhuakin, July thlaa budget puitling pharh hunah member te'n ngaihdan sawina hun an neih vek theih tur thu a sawi.
Chief Minister TR Zeliang chuan vote-on-account an pharh chhan sawiin, Planning Commission thlakna, NITI Aayog kalphung tur tihfel a la nih loh avang leh 13th Finance Commission aṭanga 14th Finance commission inthlak hun a nih avangin budget puitling pharh tura sorkar laipui nen state plan an la tihfel loh vang a ni, a ti.
Sorkar sum dinhmun chungchang sawiin Zeliang chuan March 31, 2014 thleng sorkarin deficit budget-ah cheng vaibelchhe 1234.45 a neih thu a sawi a, kumin March thla tawpah chuan vaibelchhe 1252.85 a tlin hman a rin thu a sawi bawk.
Nagaland Chief Minister Zeliang chuan financial year 2015-16 chhunga state sum lakluh tur beisei zat chu cheng vaibelchhe 11754.29 a nih thu sawiin, senso atan vaibelchhe 11578.91 an ruahman thu a sawi a, state consolidated fund-ah cheng vaibelchhe 175.38 positive balance an neih theih tur thu a sawi bawk.