NEDF-in tuikhuah lian siam tawh lo turin sorkar ngen

Hmarchhak biala pawl hrang hrang inzawmkhawm, North East Dialogue Forum (NEDF) chuan sorkar chu power siamchhuahna atana tuikhuah lian siam lo tura ngenin, 2000 MW Lower Subansiri project, 2700 MW Lower Demwe project leh 1500 MW Tipaimukh project te chu titawp turin a ngen.

NEDF chuan sorkar laipuiin hmarchhak biala power siamchhuahna atana tuikhuah lian tak tak siam a tum chu a dem thu tarlangin, hydro power chungchanga state ṭhenkhatte dan siam, Manipur Hydro Power Policy 2012 leh state dangte dan siam chu mipuite ṭha tih anga hnuhkhir an phut bawk.

NEDF chuan he thu hi tun hnaia Imphal-a press conference an neih­ah an tarlang a, NEDF member te bakah Meghalaya, Mizoram, Tripura, Nagaland leh Manipur aṭangin NGO activist te an tel.

Sorkar laipuiin mipui­te rawn loa hmarchhak biala power siam­chhuah nana tuikhuah 200 chuang siam a tum chu NEDF chuan ṭha lo an tih thu an tarlang bawk a, hydro power project te chu hmarchhak bial environment-ah nghawng ṭha lo thlen thei a ni, a ti. Tui khuahna project ṭhenkhat chu a nghawng zirchianna hmasa awm loa kalpui a nih thu a tarlang bawk.

Forum chuan international funding agency- Asian Development Bank, World Bank leh Japanese Bank of International Cooperation te chu hmarchhak bial mipuite dinhmun hrechiang hmasa loa power project kalpuina atana sum thehchhuak tawh lo turin a ngen bawk.