Nagaland cabinet-in Dimapur thilthleng CBI chhuitir a rawt

Nagaland cabinet chuan March 5-a Dimapur-a mipuiin pawngsual­tua puh, Central Jail aṭanga hnuk chhuaka, an chil hlum dan chu Central Bureau of Investigation (CBI) chhuitir a rawt.

March 18 tlaia cabinet meeting neihah he thutlukna hi siam a ni a, Chief Minister TR Zeliang chuan March 5-a Dimapur mipui kawng zawhte'n Central Jail-a lut a, pawngsualtua puh an hnuhchhuah hnua an sawisak hlum dan chu chhui tura CBI ngen an tum thu a sawi.

Meeting-ah hian Dimapur thilthleng avanga Nagaland mualpho dan chungchang te sawi ho a ni, tih sorkar thu­chhuak chuan a tarlang a, pawl hrang hrang te'n thil thleng chu CBI chhui­tir tura an phut avangin cabinet meeting chuan CBI kuta hlan an remtih thu a tarlang bawk.

Dimapur-a thilthleng judicial inquiry nei turin Nagaland sorkar chuan member pakhat- District & Sessions Judge Veprasa Nyekha a lo ruat tawh a, ni 45 chhunga report thehlut tura beisei a ni.

March 5-a Dimapur thilthleng avanga lung­awi loh lantirin Assam zirlaite chuan March 15 khan Jantar Mantar, Delhi-ah nawrh an huaihawt a, thilthleng chu Supreme Court kaihhruaina hnuai­ah CBI chhuitir turin President Pranab Mukherjee hnenah an ngen a ni.

Hetihlai hian Nagaland Police special investigation team (SIT) chuan jail tichhiaa, pawng­sualtua puh hnuhchhuahna leh thihnaa in­hnamhnawih mi 58 a man tawh a, mi 30 thlalak an tichhuak tawh bawk.

Police te chuan March 5-a thilthleng mobile phone video-a finfiahna an neih aṭangin inhnamhnawihte thlalak hi an tichhuak a ni.

Cabinet meeting-ah hian National Food Security Act (NFSA) kalpui dan tur chungchang pawh ngaihtuah a ni a, Chief Minister Zeliang chuan NFSA kalpui tura state sorkar a inbuatsaih mek thu a sawi.

Zeliang chuan Food and Civil Supply department chu NFSA kalpui turin inbuatsaih mek mah se sum leh paia state sorkar harsatna avangin chak zawka hma a lak theih loh thu a sawi a, NFSA kalpui­na sorkar laipuiah fund an dil thu a sawi bawk.